హైదరాబాద్‌లో చెత్త సేకరణ వైఫల్యం: వర్షాకాలంలో ప్రజారోగ్యానికి ముప్పు

గ్రేటర్ హైదరాబాద్ పరిధిలో చెత్త సేకరణ వ్యవస్థ విఫలమై ప్రజలు తీవ్ర ఇబ్బందులు ఎదుర్కొంటున్నారు. రోడ్ల పక్కన, కాలనీలు, బస్తీలు, ఖాళీ స్థలాల్లో చెత్త పేరుకుపోయి దుర్వాసన వ్యాపిస్తోంది. వర్షాలు కురుస్తుండటంతో నీరు నిలిచి దోమలు, ఈగలు పెరిగి డెంగీ, మలేరియా వంటి వ్యాధుల ముప్పు పెరిగింది.

GHMC కమిషనర్ ఆదేశాల ప్రకారం ప్రతి చెత్త పాయింట్‌ను ఉదయం 9:30 గంటల లోపు క్లీన్ చేయాల్సి ఉంది. కానీ చాలా ప్రాంతాల్లో మధ్యాహ్నం వరకు చెత్త తొలగించడం లేదు. కొన్ని చోట్ల కుండీలు నిండి రోడ్డుపై చెత్త పడిపోతోంది. కాంట్రాక్ట్ సిబ్బంది నిర్లక్ష్యం, అధికారుల పర్యవేక్షణ లోపమే ఇందుకు కారణమని స్థానికులు ఆరోపిస్తున్నారు.

ఇంటింటికి చెత్తబండ్లు వస్తున్నప్పటికీ కొందరు వాటికి చెత్త అందించకుండా రోడ్ల పక్కన పడేస్తున్నారు. వాహనాలు ఆలస్యంగా రావడం, టైమింగ్ సరిగా లేకపోవడంతో ప్రజలు బయట చెత్త వేస్తున్నట్లు తెలుస్తోంది. కుక్కలు, ఆవులు చెత్తను చెల్లాచెదురు చేయడంతో పరిస్థితి మరింత దారుణంగా మారుతోంది.

చెత్త సేకరణకు కోట్లాది రూపాయలు ఖర్చు చేస్తున్నామని అధికారులు చెబుతున్నా క్షేత్రస్థాయిలో ఫలితాలు లేవని ప్రజలు ఆగ్రహం వ్యక్తం చేస్తున్నారు. ఫిర్యాదు చేసినా వెంటనే స్పందన లేదని ఆరోపిస్తున్నారు. చెత్త పాయింట్లను ప్రతిరోజు పూర్తిగా క్లియర్ చేయాలని, బహిరంగ ప్రదేశాల్లో చెత్త వేసేవారిపై కఠిన చర్యలు తీసుకోవాలని పౌరులు డిమాండ్ చేస్తున్నారు.