హైదరాబాద్ హీరోస్‌కు HSBC రగ్బీ ప్రీమియర్ లీగ్-2 టైటిల్

హైదరాబాద్‌లో జరిగిన HSBC రగ్బీ ప్రీమియర్ లీగ్ రెండో సీజన్‌లో హైదరాబాద్ హీరోస్ ఛాంపియన్‌గా నిలిచింది. గచ్చిబౌలి స్టేడియంలో ఆదివారం జరిగిన ఫైనల్‌లో ముంబై డ్రీమర్స్‌ను 41-17 స్కోరుతో ఓడించి టైటిల్ సొంతం చేసుకుంది.

విజేతలుగా నిలిచిన హైదరాబాద్ హీరోస్‌కు ట్రోఫీతో పాటు రూ.45 లక్షల నగదు పారితోషికం లభించింది. రన్నరప్‌గా నిలిచిన ముంబై డ్రీమర్స్‌కు రూ.25 లక్షల నగదు బహుమతి అందజేశారు.

ఈ కార్యక్రమానికి తెలంగాణ ముఖ్యమంత్రి రేవంత్ రెడ్డి ముఖ్య అతిథిగా హాజరయ్యారు. నటుడు చిరంజీవి, బ్యాడ్మింటన్ క్రీడాకారిణి పీవీ సింధు, సినీ నటి మృణాల్ ఠాకూర్‌తో కలిసి విజేతలకు ట్రోఫీలు, నగదు బహుమతులు ప్రదానం చేశారు.

GMR స్పోర్ట్స్, రగ్బీ ఇండియా సంయుక్త ఆధ్వర్యంలో ఈ టోర్నమెంట్ నిర్వహించారు. భారీ సంఖ్యలో ప్రేక్షకులు హాజరైన ఈ ఫైనల్‌కు అంతర్జాతీయ స్థాయి రగ్బీ ఆటగాళ్లు పాల్గొనడంతో రెండో సీజన్ విజయవంతమైందని నిర్వాహకులు తెలిపారు.