హైదరాబాద్‌లో మూసారాంబాగ్ వద్ద కొత్త హైలెవల్ బ్రిడ్జ్ నేడు ప్రారంభం

హైదరాబాద్‌లోని అంబర్‌పేట, మూసారాంబాగ్ ప్రాంతాలను కలిపే కొత్త హైలెవల్ బ్రిడ్జ్ నేడు ప్రారంభం కానుంది. మూసి నదిపై 52 కోట్ల రూపాయల వ్యయంతో ఈ వంతెన నిర్మించారు.

మూసి వరదల సమయంలో మూసారాంబాగ్ పాత వంతెనపై రాకపోకలు నిలిచిపోయేవి. ఈ సమస్యకు శాశ్వత పరిష్కారంగా కొత్త వంతెన నిర్మాణం చేపట్టారు. మెయిన్ క్యారేజ్ వే 220 మీటర్లు, రెండు వైపులా 180 మీటర్ల ర్యాంప్‌లతో వంతెనను సిద్ధం చేశారు. వంతెన మొత్తం పొడవు 400 మీటర్లు, వెడల్పు 14.5 మీటర్లు. పాదచారుల కోసం 3.5 మీటర్ల పాదచారుల మార్గం ఏర్పాటు చేశారు.

ఈ వంతెనతో అంబర్‌పేట నుంచి మలక్‌పేట, దిల్‌సుఖ్‌నగర్ వైపు వెళ్లే వాహనదారులకు ప్రయోజనం చేకూరుతుంది. భారీ వరదలు వచ్చినా రాకపోకలకు అంతరాయం ఉండదని అధికారులు తెలిపారు.

ఈ ప్రాజెక్టులో రెండు లేన్లు ఉన్నాయి. ఒక లేన్ ఇప్పుడు పూర్తయిందని, మరో లేన్ వచ్చే ఏడాదిలోగా పూర్తి చేస్తామని అధికారులు తెలిపారు. గతంలో వరదల కారణంగా ఒక స్పాన్ కొట్టుకుపోయిందని, ఇప్పుడు వంతెన పూర్తవడంతో వరద నీరు అడ్డంకి లేకుండా వెళ్లే అవకాశం ఉందని వారు చెప్పారు.