హైదరాబాద్‌లో ట్రాఫిక్ సమస్యలను తగ్గించేందుకు 'అవెంజర్స్ బైక్స్' ప్రారంభం

హైదరాబాద్ నగరంలో ట్రాఫిక్ రద్దీని తగ్గించేందుకు పోలీసులు 'అవెంజర్స్ బైక్స్' పేరిట 30 కొత్త ట్రాఫిక్ పెట్రోలింగ్ బైక్‌లను అందుబాటులోకి తెచ్చారు. ప్రభుత్వ-ప్రైవేట్ భాగస్వామ్యంతో హైదరాబాద్ సిటీ సెక్యూరిటీ కౌన్సిల్ (HCSC) ఆధ్వర్యంలో ఈ బైక్‌లను రూపొందించారు. బంజారా హిల్స్‌లోని పోలీస్ కమాండ్ కంట్రోల్ కేంద్రంలో నగర పోలీస్ కమిషనర్ సజ్జనార్, ట్రాఫిక్ జాయింట్ సీపీ జోయెల్ డేవిస్‌తో కలిసి వీటిని ప్రారంభించారు.

ఈ బైక్‌ల తయారీకి రత్నదీప్, కమల్ వాచ్, బృహస్పతి టెక్నాలజీస్ తదితర సంస్థలు రూ. 1.60 కోట్లు సమకూర్చాయి. ట్రాఫిక్ నిర్వహణలో నైపుణ్యం కలిగిన 45 మంది ట్రాఫిక్ మార్షళ్లకు సీపీ సజ్జనార్ నియామక పత్రాలు అందజేశారు. వీరు రోడ్లపై వెంటనే స్పందించి ట్రాఫిక్‌ను క్లియర్ చేస్తారు.

ఈ సందర్భంగా మాట్లాడిన సీపీ సజ్జనార్, హైదరాబాద్‌లో ట్రాఫిక్ బాగుంటే ప్రజలు సంతోషంగా ఉంటారని చెప్పారు. ఎండ, వానల్లో సైతం ట్రాఫిక్ పోలీసులు రోడ్ల మీదే ఉండి సహాయం చేస్తున్నారని ప్రశంసించారు. ప్రభుత్వ-ప్రైవేట్ భాగస్వామ్యంతో ప్రజోపయోగ కార్యక్రమాలు చేపట్టడంలో HCSC కీలక పాత్ర పోషిస్తోందన్నారు.

ట్రాఫిక్ జాయింట్ సీపీ జోయెల్ డేవిస్ మాట్లాడుతూ, గతంలో 50 బైక్‌లను ప్రారంభించగా మంచి స్పందన వచ్చిందని, తాజాగా మరో 30 బైక్‌లతో ట్రాఫిక్ నిర్వహణ మరింత మెరుగవుతుందని చెప్పారు. విద్యా సంస్థలు, ఆస్పత్రుల వద్ద వాహనాల రద్దీని ట్రాఫిక్ మార్షళ్లు సమర్థంగా నివారిస్తారని తెలిపారు. బ్రేక్‌డౌన్ అయిన వాహనాలను వెంటనే తొలగించేందుకు కూడా వీరు ఉపయోగపడతారన్నారు.

ప్రజలు తాము ఎదుర్కొంటున్న ట్రాఫిక్ సమస్యలను HCSC ప్లాట్‌ఫామ్ ద్వారా నేరుగా పోలీసుల దృష్టికి తీసుకురావచ్చని జోయెల్ డేవిస్ సూచించారు. ట్రాఫిక్ మార్షళ్లను స్పాన్సర్ చేయడానికి ముందుకు రావాలని కార్పొరేట్ సంస్థలకు ఆయన విజ్ఞప్తి చేశారు. భాగ్యనగర వాసులకు ట్రాఫిక్ ఇబ్బందులు లేని ప్రయాణం అందించడమే తమ లక్ష్యమని పోలీసు అధికారులు తెలిపారు.