హైదరాబాద్ ట్రాఫిక్ పోలీసులకు 30 కొత్త పెట్రోలింగ్ బైక్‌లు

హైదరాబాద్‌లో పెరుగుతున్న ట్రాఫిక్ సమస్యలను వేగంగా పరిష్కరించేందుకు ట్రాఫిక్ పోలీసులు 30 కొత్త పెట్రోలింగ్ బైక్‌లను అందుబాటులోకి తీసుకువచ్చారు.

సిటీ సెక్యూరిటీ కౌన్సిల్ సహకారంతో సీఎస్ఆర్ నిధుల ద్వారా రూ.1.60 కోట్లతో ఈ వాహనాలను సమకూర్చారు. గతంలో ఇచ్చిన 50 బైక్‌లతో కలిపి మొత్తం 80 బైక్‌లను ప్రారంభించినట్లు ట్రాఫిక్ అధికారులు తెలిపారు.

ప్రతి బైక్‌లో జీపీఎస్ ట్రాకింగ్, వైర్‌లెస్ కమ్యూనికేషన్, పీఏ సిస్టం, సైరన్, ఫస్ట్ ఎయిడ్ కిట్, రెయిన్‌కోట్ వంటి సౌకర్యాలు ఉన్నాయి. ఇవి 27 ట్రాఫిక్ పోలీస్‌ స్టేషన్ల పరిధిలో ఫస్ట్ రెస్పాండర్లుగా పనిచేస్తాయి.

రోడ్లపై ప్రమాదాలు, వాహనాలు మొరాయించడం, వరద నీరు నిలిచిపోవడం వంటి సమయాల్లో ఈ బైక్‌లపై ఉన్న సిబ్బంది నిమిషాల్లో ఘటనా స్థలానికి చేరుకుంటారు. ట్రాఫిక్ కంట్రోల్ రూమ్‌కు సమాచారం ఇచ్చి, అవసరమైతే అంబులెన్స్, ఫైర్, డిజాస్టర్ రెస్పాన్స్ బృందాలను కూడా సమన్వయం చేస్తారు.

నగరంలో దాదాపు 95 లక్షల వాహనాలు ఉండగా, ప్రతిరోజూ 1500 నుంచి 2000 వాహనాలు కొత్తగా చేరుతున్నాయి. మొత్తం 2500-3000 మంది సిబ్బంది రెండు షిఫ్ట్‌ల్లో పనిచేస్తున్నప్పటికీ, అనేక ప్రాంతాలు సిబ్బంది లేకుండా ఉంటున్నాయి. ఈ బైక్‌లు అక్రమ పార్కింగ్, ఆక్రమణలు వంటి సమస్యలపై వేగంగా స్పందించడానికి ఉపయోగపడతాయని అధికారులు చెప్పారు.

పబ్లిక్‌-ప్రైవేట్ భాగస్వామ్యంతో మొదట సైబరాబాద్‌లో ప్రారంభమైన ఈ నమూనా హైదరాబాద్‌లోనూ విజయవంతంగా కొనసాగుతోందని ట్రాఫిక్ అధికారులు పేర్కొన్నారు. వీటి నిర్వహణ, ఇంధన బాధ్యతలను పేట్లబుర్జ్‌లోని సెంట్రల్ రిజర్వ్ హెడ్‌క్వార్టర్స్ నుంచి నిర్వహిస్తారు.