నాచారం పెద్ద చెరువు అభివృద్ధి పనులు ప్రారంభించిన హైడ్రా

హైదరాబాద్‌లోని నాచారం పెద్ద చెరువు పునరుద్ధరణ, అభివృద్ధి పనులను హైడ్రా కమిషనర్ ఏ.వి.రంగనాథ్ శుక్రవారం ప్రారంభించారు. రాష్ట్ర ప్రభుత్వం నగరంలోని నాలుగు చెరువుల అభివృద్ధికి మొత్తం 250 కోట్ల రూపాయలు కేటాయించింది. ఇందులో భాగంగా ఈ ప్రాజెక్టుకు శ్రీకారం చుట్టారు.

ఉప్పల నియోజకవర్గ పరిధిలో 108.30 ఎకరాల విస్తీర్ణంలో ఉన్న ఈ చెరువు అభివృద్ధికి 28 కోట్ల రూపాయలు ఖర్చు చేస్తున్నారు. చెరువు కట్ట బలోపేతం, వాకింగ్ ట్రాక్, విశ్రాంతి స్థలాలు, పార్కులు, పిల్లల ఆటస్థలాలు, ఓపెన్ జిమ్లు, యోగా ప్లాట్‌ఫారమ్ వంటి సౌకర్యాలు ఏర్పాటు చేస్తున్నారు.

సుమారు 10 అడుగుల మేర పూడిక, ప్లాస్టిక్ వ్యర్థాలను తొలగించి నీటి నిల్వ సామర్థ్యాన్ని గణనీయంగా పెంచనున్నారు. ఫలితంగా చెరువు నిల్వ సామర్థ్యం 2 మిలియన్ క్యూబిక్ మీటర్ల నుంచి 5 మిలియన్ క్యూబిక్ మీటర్లకు పెరుగుతుందని హైడ్రా అంచనా. వచ్చే తొమ్మిది నెలల్లో ప్రాజెక్టు పూర్తి చేసి ప్రజలకు అందుబాటులోకి తీసుకురానున్నారు.

ఈ పునరుద్ధరణ వల్ల పరిసర ప్రాంతాల్లో వరదలు తగ్గడం, భూగర్భ జలాలు పెరగడంతో పాటు దుర్వాసన, దోమల సమస్యకు శాశ్వత పరిష్కారం లభిస్తుందని అధికారులు తెలిపారు. ఇదే క్రమంలో మల్కాజగిరి జిల్లా యాప్రాల్లోని నాగిరెడ్డి కుంటను కూడా అభివృద్ధి చేస్తామని రంగనాథ్ ప్రకటించారు. చెరువుల ఆక్రమణలు, వరద కాలువల మళ్లింపు సమస్యలను పరిష్కరించాలని సంబంధిత అధికారులను ఆదేశించారు.