బోడుప్పల్లిలో పార్క్ స్థలాన్ని కబ్జాదారుల నుంచి కాపాడిన హైడ్రా

మేడ్చల్ జిల్లా బోడుప్పల్లి టెలిఫోన్ కాలనీలో కబ్జాదారుల నుంచి 166 గజాల పార్క్ స్థలాన్ని హైడ్రా అధికారులు రక్షించారు.

సర్వే నెంబర్ 78, 79లో ఉన్న ఈ స్థలాన్ని కొందరు ఆక్రమించేందుకు ప్రయత్నిస్తున్నారని స్థానికులు ఫిర్యాదు చేశారు. స్పందించిన హైడ్రా అధికారులు స్థలాన్ని పరిశీలించి, అది పార్క్ స్థలమని గుర్తించారు.

అనంతరం చుట్టూ ఫెన్సింగ్ ఏర్పాటు చేసి, పార్క్ స్థలం హెచ్చరిక బోర్డు ఏర్పాటు చేశారు. ఆక్రమించడం, అక్రమ నిర్మాణాలు చేపట్టడం చట్ట విరుద్ధమని, ఉల్లంఘించిన వారిపై కఠిన చర్యలు తీసుకుంటామని హెచ్చరించారు.

ప్రజలకు ఉపయోగపడాల్సిన ఓపెన్ స్పేస్లను కాపాడే చర్యలు కొనసాగిస్తామని అధికారులు తెలిపారు. పార్క్ స్థలం కాపాడినందుకు కాలనీవాసులు హర్షం వ్యక్తం చేశారు.