ICC మహిళల T20 WC 2026: టీమిండియా ఆస్ట్రేలియా చేతిలో ఓడి వరల్డ్ కప్ నుంచి నిష్క్రమించింది

సరిగ్గా ఏడాది క్రితం వన్డే ప్రపంచ కప్ ను గెలిచి ఆకాశమే హద్దుగా సంబరాలు చేసుకున్న భారత మహిళల జట్టు నేడు భావోద్వేగ క్షణాలతో ICC మహిళల T20 ప్రపంచ కప్ నుంచి నిష్క్రమించింది. తప్పక గెలవాల్సిన మ్యాచ్‌లో సెమీఫైనల్ బెర్త్ ను సొంతం చేసుకోవాల్సిన సువర్ణ అవకాశాన్ని చేజేతుల కోల్పోయి కన్నీళ్లతో టోర్నీ నుంచి హర్మన్‌ప్రీత్ సేన నిష్క్రమించింది.

నాకౌట్ చేరాలంటే తప్పనిసరిగా గెలవాల్సిన మ్యాచ్‌లో భారత్ ఆరు వికెట్ల తేడాతో ఆస్ట్రేలియా చేతిలో ఓడిపోయింది. మొదట బ్యాటింగ్ చేసిన భారత్ నాలుగు వికెట్లకు 170 పరుగులు సాధించింది. హర్మన్‌ప్రీత్ 56 పరుగులు, షెఫాలీ వర్మ 34 పరుగులు, స్మృతి మందాన 38 పరుగులు, జమీమా రోడ్రిగ్స్ 34 పరుగులు చేశారు. అయితే నెమ్మదిగా ఆడడం వల్ల భారత్ అవసరమైన స్కోరు కంటే తక్కువగా ముగించింది.

171 పరుగుల లక్ష్యంతో బరిలోకి దిగిన ఆస్ట్రేలియా ఎలీస్ పెర్రీ 56 పరుగులు, ఆష్లే గార్డనర్ 53 పరుగుల మెరుపు ప్రదర్శనతో 19 ఓవర్లలో నాలుగు వికెట్లు కోల్పోయి లక్ష్యాన్ని చేదించింది.

చేదింపు ఇన్నింగ్స్‌లో రేణుక సింగ్ రెండో బంతికే జార్జియా వాల్‌ను వికెట్ల ముందు అవుట్ చేసి భారత్‌కు శుభారంభం ఇచ్చింది. టోర్నీలో అద్భుత ప్రదర్శన చేసిన తెలుగు అమ్మాయి శ్రీచరణి, ప్రమాదకరంగా ఉన్న లిచ్‌ఫీల్డ్‌ను అవుట్ చేసి భారత్‌ను పోటీలోకి తెచ్చింది. ఆ వెంటనే దీప్తి శర్మ మరొక వికెట్ తీయడంతో ఆస్ట్రేలియా ఇబ్బందుల్లో పడింది.

12 ఓవర్లకు ఆస్ట్రేలియా స్కోరు 85/3 గా ఉండటంతో భారత్‌కు మెరుగైన అవకాశాలు కనిపించాయి. కానీ పెర్రీ, ఆష్లే కలిసి ఒత్తిడిని భారత్ మీదికి మళ్ళించారు. 13వ ఓవర్లో 17 పరుగులు రావడంతో ఆస్ట్రేలియా బలంగా పుంజుకుంది. రేణుక 17వ ఓవర్లో 17 పరుగులు ఇచ్చుకోవడంతో మ్యాచ్ భారత్ చేజారింది.

బ్యాటింగ్‌లో ఓపెనర్లు స్మృతి మందాన, షెఫాలీ వర్మ అతి జాగ్రత్తగా ఆడడం భారత్‌ను దెబ్బతీసింది. స్మృతి బంతికో పరుగు చొప్పున నెమ్మదిగా ఆడి 12వ ఓవర్లో వెనుదిరిగింది. 19వ ఓవర్లో జమీమా క్యాచ్‌ను బౌండరీ వద్ద వేర్హామ్ వదిలేయడంతో అది సిక్స్ అయింది. ఒక ఓవర్ మిగిలి ఉండగా స్కోరు 147 మాత్రమే ఉండగా హర్మన్‌ప్రీత్ ఆఖరి ఓవర్లో హ్యాట్రిక్ సిక్సర్లు బాదింది. చివరి బంతికి దీప్తి ఫోర్ కొట్టడంతో 23 పరుగులు వచ్చి స్కోరు 170కి చేరింది.

గతేడాది వన్డే ప్రపంచ కప్ గెలిచినప్పుడు భారత మహిళల క్రికెట్ సరికొత్త శిఖరాలను తాకింది. కానీ ఈ T20 కప్‌లో గ్రూప్ దశలోనే నిష్క్రమించడం అభిమానులను తీవ్రంగా నిరాశపరిచింది. టోర్నీ ఆరంభం నుంచే స్థిరత్వం లేని ప్రదర్శన, కీలక మ్యాచ్‌లలో చేతులెత్తేసిన బలహీనత భారత్‌ను వెంటాడాయి. బౌలింగ్, డెత్ ఓవర్ల వ్యూహాలు, ఫీల్డింగ్ ప్రమాణాలు, ఒత్తిడిలో బ్యాటింగ్ చేయడం వంటి అంశాలపై ప్రత్యేక శ్రద్ధ పెట్టాల్సిన అవసరం ఉంది.