తెలంగాణలోని పలు జిల్లాలకు వాతావరణ శాఖ భారీ వర్ష హెచ్చరిక

తెలంగాణలోని పలు జిల్లాల్లో భారీ వర్షాలు కురిసే అవకాశం ఉన్నట్లు వాతావరణ శాఖ అధికారులు హెచ్చరించారు. మరికొన్ని జిల్లాల్లో తేలికపాటి నుంచి మోస్తరు వర్షాలు కురుస్తాయని తెలిపారు.

కొమరంభీం అసిఫాబాద్, మంచిర్యాల, నిర్మల్, నిజామాబాద్, పెద్దపల్లి, జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం జిల్లాలకు హెవీ రైన్ ఫాల్ అలర్ట్ జారీ చేశారు. గంటకు 30 నుంచి 40 కి.మీ. వేగంతో ఉరుములు, మెరుపులు, ఈదురుగాలులతో కూడిన భారీ వర్షాలు పడే అవకాశం ఉందన్నారు.

ఆదిలాబాద్, నల్గొండ, సూర్యాపేట, రంగారెడ్డి, హైదరాబాద్, మేడ్చల్, మల్కాజగిరి, వికారాబాద్, సంగారెడ్డి, మెదక్, కామారెడ్డి జిల్లాల్లో అక్కడక్కడ వర్షాలు కురుస్తాయని వెదర్ ఆఫీసర్స్ తెలిపారు. ఇప్పటికే మహబూబాబాద్, కుమరంభీం జిల్లాల్లో మోస్తరు నుంచి భారీ వర్షం పడింది. మహబూబాబాద్, గూడూరు, బయ్యారం, గార్ల, నెల్లికుదురు మండలాల్లో వర్షం కురవగా, రోడ్లు జలమయమయ్యాయి. వాహనదారులు ఇబ్బందులు ఎదుర్కొన్నారు.

వాతావరణ శాఖ అధికారులు ఎల్నినో ఎఫెక్ట్ కారణంగా సాధారణ వర్షపాతమే నమోదవుతుందని వివరించారు. జూన్ నెలలో 15% లోటు వర్షపాతం నమోదైందని, జూలైలో కూడా 10-12% తక్కువ వర్షాలు పడే అవకాశం ఉందని చెప్పారు. వర్షాలు అంతంత మాత్రంగా ఉండడంతో రైతులు అప్రమత్తంగా ఉండాలని సూచించారు.

నీటి వృధాను నివారించాలని, ప్రతి నీటి బొట్టు విలువైనదని వాతావరణ శాఖ హెచ్చరించింది. రాబోయే 2-3 రోజుల్లో రాష్ట్రంలో అక్కడక్కడ చెదురుమదురు వర్షాలు కొనసాగుతాయని తెలిపారు.