తెలంగాణలో భారీ వర్షాలకు IMD హెచ్చరిక; 11 జిల్లాలకు ఎల్లో అలర్ట్

తెలంగాణలో రానున్న గంటల్లో భారీ వర్షాలు, ఈదురుగాలులతో కూడిన ఉరుములు, మెరుపులు వచ్చే అవకాశం ఉందని భారత వాతావరణ శాఖ (IMD) హెచ్చరించింది. దీంతో 11 జిల్లాలకు ఎల్లో అలర్ట్ జారీ చేశారు.

ఆదిలాబాద్, కుమురం భీం ఆసిఫాబాద్, నిర్మల్, మంచిర్యాల, జగిత్యాల, ములుగు, భద్రాద్రి కొత్తగూడెం, సూర్యాపేట, మెదక్, సంగారెడ్డి, కామారెడ్డి జిల్లాల్లో ఉరుములు, మెరుపులతో వర్షాలు కురుస్తాయని వాతావరణ శాఖ పేర్కొంది. ఆయా ప్రాంతాల్లో పిడుగులు పడే ప్రమాదం ఉన్నందున, అవసరమైతే తప్ప బయటకు రావద్దని అధికారులు సూచించారు. పిడుగుల సమయంలో చెట్ల కింద, బహిరంగ ప్రదేశాల్లో ఉండడం ప్రమాదకరమని హెచ్చరించారు.

మరికొన్ని జిల్లాలకు ఆరెంజ్ అలర్ట్ కూడా జారీ చేసినట్లు IMD తెలిపింది. ఈశాన్య మధ్యప్రదేశ్ నుంచి తెలంగాణ–విదర్భ వరకు, ఉత్తర కోస్తాంధ్ర నుంచి మధ్య మహారాష్ట్ర–ఛత్తీస్‌గఢ్ వరకు ద్రోణులు కొనసాగుతున్నాయని, వీటి ప్రభావంతో సోమ, మంగళవారాల్లో ఉత్తర తెలంగాణ జిల్లాల్లో భారీ వర్షాలు కురిసే అవకాశం ఉందని పేర్కొంది.

నిన్న (ఆదివారం) రాష్ట్రంలో పలుచోట్ల భారీ వర్షం కురిసింది. ఖమ్మం జిల్లాలో అత్యధికంగా 7.8 సెం.మీ. వర్షపాతం నమోదైంది. ములుగు జిల్లా ఏటూరు నాగారంలో 7.3 సెం.మీ., సంగారెడ్డి జిల్లా మూగుడంపల్లిలో 5.7 సెం.మీ., మహబూబాబాద్ జిల్లా దోర్నకల్ మండలం పెరుమాన్లలో 5.1 సెం.మీ. వర్షం కురిసినట్లు వాతావరణ శాఖ నివేదించింది.

హైదరాబాద్‌లో రానున్న మూడు రోజులూ భారీ వర్షాలు కొనసాగుతాయని IMD హెచ్చరించడంతో జలమండలి అధికారులు అప్రమత్తమయ్యారు. హిమాయత్‌సాగర్ జలాశయం పూర్తి సామర్థ్యానికి (1763 అడుగులు) కేవలం ఒక అడుగు దూరంలో ఉంది; ప్రస్తుత నీటి మట్టం 1762 అడుగులు. ఆదివారం సాయంత్రం ఒక గేట్ ఎత్తి 339 క్యూసెక్కుల నీటిని ఈసీ నదిలోకి విడుదల చేశారు. నగరంలో డ్రైనేజీలు శుభ్రం చేసి, మండల, జిల్లా స్థాయి అధికారులు తమ ప్రాంతాల్లో అందుబాటులో ఉండాలని ఆదేశాలు జారీ చేశారు.