లైంగిక భాగస్వాముల సగటులో భారత్ చివరి స్థానం: 2026 గ్లోబల్ రిపోర్ట్

జీవితకాలంలో ఒక వ్యక్తికి సగటున ఎంతమంది లైంగిక భాగస్వాములు ఉంటారనే అంశంపై విడుదలైన 2026 గ్లోబల్ రిపోర్ట్‌లో భారత్ 50 దేశాల్లో చివరి స్థానంలో నిలిచింది.

ఈ నివేదిక ప్రకారం, భారతీయులకు జీవితకాలంలో సగటున ముగ్గురు లైంగిక భాగస్వాములు మాత్రమే ఉంటారు. ప్రపంచ సగటు 9 మందిగా నమోదైంది. ఈ జాబితాలో టర్కీ సగటు 14 నుంచి 15 మందితో తొలి స్థానంలో నిలిచింది. ఆస్ట్రేలియా, న్యూజిలాండ్, ఐస్లాండ్, దక్షిణాఫ్రికా తర్వాతి స్థానాల్లో ఉన్నాయి. అమెరికాలో సగటు 10 నుంచి 15 మంది, యూకేలో 9 నుంచి 10 మందిగా ఉంది.

భారత్ తక్కువ స్థానంలో ఉండడానికి కుటుంబ వ్యవస్థ, వివాహ బంధానికి ఇచ్చే ప్రాధాన్యం, సంప్రదాయ విలువలు, మతపరమైన, సామాజిక నిబంధనలు ప్రధాన కారణాలని నివేదిక వివరించింది.

ఈ గణాంకాలు సర్వేలో పాల్గొన్న వారి సమాధానాల ఆధారంగా రూపొందిన సగటు అంచనాలు మాత్రమే. దేశంలోని ప్రతి వ్యక్తిని ఇవి సూచించవని, దీన్ని దేశస్థాయి గణాంకంగా మాత్రమే చూడాలని నివేదిక స్పష్టం చేసింది.