చింతపిక్కలతో మైక్రోప్లాస్టిక్ ఫిల్టర్ తయారు చేసిన భారతీయ విద్యార్థులకు ఎర్త్ ప్రైజ్ 2026

చింతపిక్కల సహజ బంధక గుణాలను ఉపయోగించి భారతీయ విద్యార్థుల బృందం నీటిలోని మైక్రోప్లాస్టిక్స్‌ను తొలగించే వినూత్న పద్ధతిని అభివృద్ధి చేసింది. ఈ ప్రాజెక్ట్‌కు 2026 ఎర్త్ ప్రైజ్ గ్లోబల్ విన్నర్ అవార్డు లభించింది.

చింతపిక్కల నుండి తయారు చేసిన పౌడర్‌ను మైక్రోప్లాస్టిక్స్ కలిగిన నీటిలో కలిపితే ఆ పౌడర్ ప్లాస్టిక్ కణాలను తనవైపుకు ఆకర్షించి ఒక పెద్ద ముద్దగా మారుస్తుంది. ఆ తర్వాత ఒక చేతి అయస్కాంతం సహాయంతో ఆ ముద్దను నీటి నుండి బయటకు తీయవచ్చు. ఈ పద్ధతిలో విద్యుత్ లేదా రసాయనాలు అవసరం లేదు. ఇది అత్యంత చౌకైన నీటి శుద్ధి పద్ధతిగా గుర్తింపు పొందింది.

ఈ ప్రాజెక్ట్ మొదట ఆసియా ప్రాంత కేటగిరీలో విజయం సాధించింది. ఆ తర్వాత మే 2026 లో జరిగిన అంతర్జాతీయ ఓపెన్ ఓటింగ్‌లో ప్రపంచవ్యాప్తంగా దాదాపు 23,000 మంది ఓటు వేసి ఈ భారతీయ బృందాన్ని ఉత్తమంగా ఎంపిక చేశారు. మే 29, 2026న స్విట్జర్లాండ్‌లోని జెనీవాలో జరిగిన అధికారిక వేడుకలో ఈ బృందానికి ఎర్త్ ప్రైజ్ 2026 గ్లోబల్ విన్నర్‌గా ప్రకటించారు. ఈ అవార్డు సాధించిన మొట్టమొదటి ఇండియన్ టీం ఇదే.

ప్రాజెక్ట్ అభివృద్ధి కోసం టీమ్‌కు 12,500 అమెరికన్ డాలర్ల గ్రాంట్ లభించింది. ఇప్పటికే వర్క్‌షాప్‌ల ద్వారా 8,000 మందికి పైగా విద్యార్థులు, ఉపాధ్యాయులకు ఈ పద్ధతి గురించి అవగాహన కల్పించారు. 2026 సంవత్సరం చివరినాటికి వికేంద్రీక తయారీ కేంద్రాలను ఏర్పాటు చేసి, భారతదేశంలోని గ్రామీణ ప్రాంతాల్లో సుమారు 40 వేల మందికి స్వచ్ఛమైన, మైక్రోప్లాస్టిక్స్ లేని తాగునీటిని అందించడం ఈ బృందం లక్ష్యం.