ఇరాన్ ప్రతీకార దాడులు విస్తరించాయి, బహరైన్ అలర్ట్; చమురు ధరలు పెరిగాయి

ఇరాన్ తాజా ప్రతీకార దాడులు గల్ఫ్ దేశాలపై విస్తరించాయి. అమెరికా నౌకాదళ ఐదవ ఫ్లీట్ ప్రధాన కార్యాలయం ఉన్న బహరైన్‌లో ప్రభుత్వం అత్యవసర హెచ్చరిక జారీ చేసింది. ప్రజలు సురక్షిత ప్రాంతాలకు తరలివెళ్లాలని ఆదేశాలు వెలువడ్డాయి.

ఈ క్రమంలోనే జోర్డాన్ ఎయిర్‌బేస్‌లో ఇంధన ట్యాంకులు, క్షిపణి నిల్వలు ధ్వంసమయ్యాయి. ఇరాన్ రివల్యూషనరీ గార్డ్స్ (IRGC) రాబోయే రోజుల్లో మరిన్ని దాడులు ఉండొచ్చని హెచ్చరించారు. మరోవైపు అమెరికా గల్ఫ్ లోని వివిధ ప్రాంతాల్లో హిమార్స్ రాకెట్ లాంచర్లను మోహరించింది.

అమెరికా క్షిపణులు ఇరాన్ లోతట్టు ప్రాంతాలపై దాడులు చేశాయి. మధ్య ఇరాన్ లోని కొందాబ్ లో భారీ పేలుళ్లు సంభవించాయి.

ఈ ఉద్రిక్తతల నేపథ్యంలో ప్రపంచ చమురు మార్కెట్‌పై తీవ్ర ప్రభావం పడింది. బ్యారెల్ ధర 4.16% పెరిగి 79.17 డాలర్లకు చేరింది.

ఇరాన్ దాడులను ఇస్లామిక్ సహకార సంస్థ (OIC) తీవ్రంగా ఖండించింది. ఇవి దేశాల సార్వభౌమత్వాన్ని, పొరుగు సంబంధాల నియమాలను ఉల్లంఘించినట్లు పేర్కొంది. ఐక్యరాజ్య సమితి పూర్తి స్థాయి యుద్ధం వినాశకరమైన పరిణామాలకు దారితీస్తుందని హెచ్చరించింది. అమెరికా-ఇరాన్ మధ్య ఉద్రిక్తతలను తగ్గించేందుకు పాకిస్తాన్, ఖతార్, ఈజిప్ట్ దౌత్య చర్చలు జరుపుతున్నాయి.