చెరకు తోటలను పడిపోకుండా కాపాడే ‘జడచుట్లు’ పద్ధతి: కోస్తా రైతులకు కృషి విజ్ఞాన కేంద్రం సూచనలు

ప్రస్తుతం తెలుగు రాష్ట్రాల్లో చెరకు తోటలు 6 నుంచి 8 నెలల వయసులో ఉన్నాయి. కోస్తా జిల్లాల్లో భారీ వర్షాలు, తుఫాన్ల కారణంగా చెరకు గడలు పడిపోయే ప్రమాదం ఎక్కువగా ఉంటుంది. దీనివల్ల దిగుబడి తగ్గడం, పంచదార శాతం పడిపోవడం, ఎలుకలు, పందులు పంటను నాశనం చేయడం వంటి నష్టాలు వాటిల్లుతాయి.

ఈ సమస్యను అధిగమించేందుకు శ్రీకాకుళం జిల్లా ఆముదాలవలస కృషి విజ్ఞాన కేంద్రం శాస్త్రవేత్త డాక్టర్ రాజ్కుమార్ ‘జడచుట్లు’ అనే పద్ధతిని సూచిస్తున్నారు. జులై నుంచి ఆగష్టు మధ్యకాలంలో రైతులు ఈ పద్ధతిని పాటించాల్సి ఉంటుంది.

జడచుట్టు ఎలా చేయాలంటే: పక్కపక్కనే ఉన్న రెండు వరుసల చెరుకు గడల నుంచి ముదిరిన, పండుబారిన ఆకులను మాత్రమే తీసుకోవాలి. వాటిని 5 సెంటీమీటర్ల వ్యాసం ఉండే తాడులాగా పేనుకొని, గడను మరో గడకు కట్టివేయాలి. లేత ఆకులను ఈ జడచుట్లో చేర్చకూడదని డాక్టర్ రాజ్కుమార్ హెచ్చరిస్తున్నారు. లేత ఆకులు కిరణజన సంయోగక్రియకు సహాయపడతాయి కాబట్టి వాటిని వదిలిపెట్టాలి.

పైన ఉన్న ఆరు నుంచి ఎనిమిది లేత ఆకులను విడిచిపెట్టి, క్రింది ముదురు ఆకులతో మాత్రమే జడచుట్టు వేయాలి. చెరుకు మొక్క ఎత్తు పెరిగే కొద్దీ రెండు, మూడు, నాలుగు జడచుట్లు వేసుకుంటూ ఉండాలి. ఇలా చేయడం వల్ల తోట మొత్తం పడిపోకుండా నిలకడగా ఉంటుంది.

‘ర్యాపింగ్ అండ్ స్టేకింగ్’ అనే మరో పద్ధతి కూడా ఉంది. దీనిలో మొదట రెండు, మూడు గడల్ని కలిపి ఒకసారి చుట్టాలి. తర్వాత నాలుగు గడల్ని కలిపి రెండో చుట్టు చుట్టడం జరుగుతుంది. ఈ పద్ధతులతో చెరుకు దిగుబడి, పంచదార శాతం, బెల్లం నాణ్యత మెరుగుపడతాయని శాస్త్రవేత్త తెలిపారు.