నిధుల కోసం పోరాడతా, అభివృద్ధే లక్ష్యం: జడ్చర్ల ఎమ్మెల్యే అనిరుధ్ రెడ్డి

జడ్చర్ల నియోజకవర్గ ఎమ్మెల్యే అనిరుధ్ రెడ్డి తన నియోజకవర్గం అభివృద్ధికి అవసరమైన నిధుల కోసం అవసరమైతే పోరాడతానని అన్నారు. పార్టీకి వ్యతిరేకంగా కాదని, నిధుల కోసం డిమాండ్ చేస్తానని ఆయన స్పష్టం చేశారు.

ఆర్ అండ్ బీ, పంచాయితీ రాజ్ శాఖల కింద జరుగుతున్న రోడ్లు, భవనాల నిర్మాణ పనుల బిల్లులు విడుదల చేయాల్సిన అవసరం ఉందని ఆయన చెప్పారు. గత బీఆర్ఎస్ ప్రభుత్వం చేసిన అప్పుల కారణంగా బిల్లులు చెల్లించలేని పరిస్థితి ఏర్పడిందని ఆరోపించారు. సీఎం రేవంత్రెడ్డి రూ.631 కోట్లు విడుదల చేసిన తర్వాత అభివృద్ధి పనులు ముమ్మరమయ్యాయని ఆయన తెలిపారు.

ఇటీవల కార్పొరేషన్ల చైర్మన్ల పదవీ కాలం పూర్తవుతుండడంతో నియోజకవర్గంలో కొంత ఆందోళన నెలకొన్న విషయాన్ని ఆయన ప్రస్తావించారు. రెండేళ్ల తర్వాత చైర్మన్లను మారుస్తున్నప్పుడు, మంత్రుల విషయంలోనూ అదే పద్ధతి వర్తింపజేయాలని ప్రజలు అంటున్నారని ఆయన పేర్కొన్నారు. కానీ పార్టీ నిర్ణయమే అంతిమమని, తాను ప్రజల అభిప్రాయాలను అధిష్టానం దృష్టికి తీసుకెళ్తానని అనిరుధ్ రెడ్డి స్పష్టం చేశారు.