జనసేన ఎమ్మెల్యే అరవ శ్రీధర్‌పై రెండు చోట్ల ఫిర్యాదులు నమోదు

కోడూరు నియోజకవర్గం జనసేన ఎమ్మెల్యే అరవ శ్రీధర్‌కు సంబంధించిన ఒక వీడియో సోషల్ మీడియాలో వ్యాప్తి చెందింది. ఆ వీడియోలో ఆయన ఒక మహిళా ఉద్యోగితో కారులో ప్రయాణిస్తూ చేసిన సంభాషణ ఉంది. ముఖ్యంగా ముస్లిం మహిళలపై చేసిన వ్యాఖ్యలు వివాదాస్పదమయ్యాయి.

ఈ నేపథ్యంలో రెండు వేర్వేరు పోలీస్ స్టేషన్లలో ఫిర్యాదులు నమోదయ్యాయి. పెనుగలూరు పోలీస్ స్టేషన్‌లో భాషా అనే వ్యక్తి ఫిర్యాదు చేశారు. మంగళగిరి పోలీస్ స్టేషన్‌లో ముస్లిం సమైక్య వేదిక రాష్ట్ర ఉపాధ్యక్షులు మౌలా బేగ ఫిర్యాదు అందజేశారు.

ఉర్దూ అకాడమీ మాజీ డైరెక్టర్ అబ్దుల్ కలీం అరవ శ్రీధర్‌పై సుమోటో కేసు నమోదు చేయాలని డిమాండ్ చేశారు. ముస్లిం సంఘాలు, మహిళా సంఘాలు కూడా ఆగ్రహం వ్యక్తం చేశాయి. ఎమ్మెల్యే పదవికి రాజీనామా చేయాలని లేదా వివరణ ఇవ్వాలని డిమాండ్ వస్తోంది.

ఫిర్యాదులు అందాయి కానీ కేసు నమోదు దాకా రాలేదని తెలుస్తోంది. పోలీసులు ఏ చర్యలు తీసుకుంటారనేది వేచి చూడాల్సి ఉంది. అరవ శ్రీధర్ స్పందన ఇంకా లభ్యం కాలేదు.