ఓహియో ప్రచార సభలో డెమొక్రటిక్ నాయకులపై JD Vance విమర్శలు

అమెరికా మధ్యంతర ఎన్నికలకు ముందు రోజు ఓహియోలో జరిగిన ప్రచార సభలో US ఉపాధ్యక్షుడు JD Vance డెమొక్రటిక్ నాయకులపై తీవ్ర విమర్శలు చేశారు. మోసగాళ్లకు ప్రయోజనాలు పంచే రాజకీయ నాయకులపై తనకు విసుగు పుట్టిందని, పన్ను చెల్లింపుదారుల డబ్బును కాపాడే బదులు మోసగాళ్లను ఆదుకునే రాజకీయాలను ప్రజలు తిరస్కరించాలని ఆయన పిలుపునిచ్చారు.

తన ప్రచారాన్ని తాను రాజకీయ జీవితం ప్రారంభించిన ఓహియో రాష్ట్రంలోనే ముగిస్తున్నట్లు Vance చెప్పారు. ‘నా జీవితకాలంలోనే అత్యంత కీలకమైన మధ్యంతర ఎన్నికల ముందు మనం ఉన్నాం’ అని ఆయన అన్నారు. చర్మవర్ణం ఆధారంగా ఒకరినొకరు ఎదురించుకునేలా ప్రజలను విభజించే రాజకీయ నాయకులపై తనకు విరక్తి ఉందని కూడా ఆయన వ్యాఖ్యానించారు. తక్కువ పన్నులు, సామాన్య జ్ఞానం, దేశభక్తి విలువలకు తామే వేదిక అని ఆయన చెప్పారు.

ఓహియో గవర్నర్ ఎన్నికల్లో రిపబ్లికన్ అభ్యర్థి వివేక్ రామస్వామికి ఆయన మద్దతు పలికారు. రామస్వామికి ఓటు వేయడం ద్వారా ఒకే దెబ్బకు రెండు పిట్టలు కొట్టినట్లు అవుతుందని, అంటే ఓహియోకు మంచి నాయకుడిని ఎన్నుకోవడమే కాకుండా డెమొక్రటిక్ అభ్యర్థి అమీ ఆక్టన్ మళ్లీ అధికారంలోకి రాకుండా అడ్డుకోవచ్చని ఆయన అన్నారు. అమీ ఆక్టన్ గతంలో అధికారంలో ఉన్నప్పుడు పాఠశాలలు, చర్చిలను మూసివేసినట్లు Vance ఆరోపించారు. అమీ ఆక్టన్, షెరోడ్ బ్రౌన్ లాంటి నాయకులతో విసుగు వచ్చిందని, ఇక వివేక్ రామస్వామి, జాన్ హ్యూస్టన్ నాయకత్వం కోసం తాను సిద్ధంగా ఉన్నానని చెప్పారు. చివర్లో డెరెక్ మెర్రిన్, వివేక్ రామస్వామి, జాన్ హ్యూస్టన్‌లకు ఓటు వేయాలని ఓహియో ఓటర్లకు పిలుపునిచ్చారు.

భారత సంతతికి చెందిన వ్యాపారవేత్త వివేక్ రామస్వామి గతంలో రిపబ్లికన్ పార్టీ అధ్యక్ష ప్రైమరీలో పోటీ చేశారు. ఇప్పుడు ఆయన ఓహియో రాష్ట్ర రాజకీయాల్లో కేంద్ర స్థానంలో ఉన్నారు. ఓహియోలో రేపు పోలింగ్ జరగనుంది.