కర్నూలు జొన్నగిరిలో 50 టన్నుల బంగారం నిల్వలు; 24న సీఎం చంద్రబాబు ప్రారంభోత్సవం

ఆంధ్రప్రదేశ్‌లోని కర్నూలు జిల్లా జొన్నగిరి ప్రాంతంలో 50 టన్నుల బంగారు నిల్వలు ఉన్నట్లు రాష్ట్ర ప్రభుత్వం గుర్తించింది. జొన్నగిరితో పాటు రామగిరి, జవకుల, చిగురుకుంట, బిసత్నం ప్రాంతాల్లో కూడా బంగారం తవ్వకాలకు అనుకూలమైన అవకాశాలు ఉన్నట్లు తెలిపింది. ఈ మేరకు రాష్ట్ర గనులు, ఖనిజ శాఖ మంత్రి కొల్లు రవీంద్ర ప్రకటించారు.

జియో మైసూర్ సర్వీసెస్ ఇండియా ప్రైవేట్ లిమిటెడ్ అనే సంస్థ ఈ ప్రాంతంలో ఇప్పటికే మినీ ప్లాంట్ ఏర్పాటు చేసింది. ఈ సంస్థ రోజుకు 10,000 టన్నుల బంగార ఖనిజాన్ని తవ్వి, 1,000 టన్నుల ఖనిజం నుంచి 1 కిలో స్వచ్ఛమైన బంగారాన్ని ఉత్పత్తి చేస్తోంది. కంపెనీ సర్వే ప్రకారం ఈ ప్రాంతంలో కోటి టన్నుల బంగార ఖనిజ నిల్వలు ఉన్నట్లు అంచనా.

తుగ్గలి మండలం జొన్నగిరి, తగిరాయ, ఎర్రగుడి గ్రామాల పరిధిలోని 1,477 ఎకరాల్లో ఈ ప్రాజెక్టుకు అనుమతి లభించింది. సీఎం చంద్రబాబు నాయుడు ఈ నెల 24వ తేదీన ఈ బంగారు ఉత్పత్తి ప్లాంటును ప్రారంభించనున్నారు. ఇదివరకే మంత్రి కొల్లు రవీంద్ర, స్థానిక ఎమ్మెల్యే కేఈ శాంబాబు ప్లాంటును పరిశీలించారు.

కంపెనీ అంచనాల ప్రకారం మొదటి సంవత్సరం 600 కిలోల బంగారం, రెండో సంవత్సరం 1,500 కిలోల బంగారం ఉత్పత్తి చేయనున్నారు. ఈ ప్రాజెక్టు వల్ల స్థానికంగా 1,000 మందికి ఉపాధి లభిస్తుందని చెబుతున్నారు. 2043 వరకు తవ్వకాల అనుమతితో పాటు, ఆ తర్వాత మరో 50 సంవత్సరాల పాటు కొనసాగించేందుకు ముందస్తు అనుమతి ఉంది.

ప్రస్తుతం భారతదేశం తన బంగారం అవసరాల్లో 80 శాతం దిగుమతి చేసుకుంటోంది. కర్నూలు జిల్లాలో ఈ తరహా భారీ బంగారం ఉత్పత్తి కేంద్రం ప్రారంభం కావడంతో రాష్ట్ర ఆర్థిక దిశపై సానుకూల ప్రభావం పడే అవకాశం ఉందని విశ్లేషకులు భావిస్తున్నారు.