బీజేపీ జాతీయ అధ్యక్షుడు జె.పి. నడ్డా వరంగల్‌లో పర్యటించారు

బీజేపీ జాతీయ అధ్యక్షుడు జె.పి. నడ్డా నేడు తెలంగాణ పర్యటనలో భాగంగా వరంగల్‌కు వచ్చారు. విబిఐటి ఘటకేసర్ కాలేజీలో జరిగిన కార్యక్రమం అనంతరం రోడ్డు మార్గంలో వరంగల్ చేరుకున్నారు. జనగామ జిల్లా రాంపూర్ వద్ద బీజేపీ కార్యకర్తలు స్వాగతం పలికారు.

మధ్యాహ్నం హరిత కాకతీయ హోటల్లో ఉమ్మడి వరంగల్ జిల్లా గిరిజన ప్రతినిధులతో సమావేశం నిర్వహించారు. ఈ సందర్భంగా గిరిజన నృత్యాలు, సాంస్కృతిక కార్యక్రమాలు జరిగాయి. అనంతరం గిరిజన ప్రతినిధులతో కలిసి భోజనం చేసి, వారి సమస్యలు, పరిస్థితులపై చర్చించారు.

ఆ తర్వాత ఆర్ట్స్ కాలేజీలో గ్రేటర్ వరంగల్ మున్సిపల్ కార్పొరేషన్ పరిధిలోని బూత్ స్థాయి కార్యకర్తలతో సమావేశమయ్యారు. ఈ సమావేశంలో రాబోయే మున్సిపల్ ఎన్నికలకు పార్టీని సిద్ధం చేయడంపై చర్చించారు. సాయంత్రం భద్రకాళీ అమ్మవారి ఆలయాన్ని సందర్శించి ప్రత్యేక పూజలు చేశారు.

నడ్డా రాకతో వరంగల్ నగరంలో బీజేపీ కార్యకర్తలు కాషాయ జెండాలు ఏర్పాటు చేశారు. పోలీస్ కమిషనర్ సన్ప్రీత్ సింగ్ ఆధ్వర్యంలో భద్రతా ఏర్పాట్లు కట్టుదిట్టంగా ఉన్నాయి. హరిత కాకతీయ, ఆర్ట్స్ కాలేజీ, భద్రకాళి ఆలయం వద్ద ప్రత్యేక పోలీస్ పహారా ఏర్పాటు చేశారు.

ఈ మూడు రోజుల తెలంగాణ పర్యటనలో హైదరాబాద్, వరంగల్‌పై దృష్టి సారించినట్లు బీజేపీ వర్గాలు తెలిపాయి. గతంలో ప్రధాని మోడీ హైదరాబాద్ నుంచి వరంగల్ రైల్వే ప్రాజెక్టులను వర్చువల్‌గా ప్రారంభించారు. నడ్డా పర్యటన ద్వారా స్థానికంగా పార్టీని బలోపేతం చేసే ప్రయత్నం జరుగుతోంది.