జూపిటర్ వ్యాగన్స్ దూకుడు: FY28 నాటికి రూ.10,000 కోట్ల రెవెన్యూ లక్ష్యం

దేశీయ రైల్వే వ్యాగన్ల తయారీ దిగ్గజం జూపిటర్ వ్యాగన్స్ FY28 నాటికి రూ.10,000 కోట్ల రెవెన్యూ సాధించాలని లక్ష్యంగా పెట్టుకున్నట్లు కంపెనీ ఎండీ వివేక్ లోహియా వెల్లడించారు. ఈ లక్ష్యాన్ని చేరుకోవడానికి వ్యాగన్లతో పాటు బ్యాటరీ ఎనర్జీ స్టోరేజ్ సిస్టమ్స్ (BESS), వీల్ బిజినెస్ వంటి కొత్త రంగాల్లో విస్తరిస్తున్నట్లు తెలిపారు.

ప్రస్తుతం కంపెనీ వద్ద రూ.4,000 కోట్ల ఆర్డర్ బుక్ ఉండగా, ఇందులో 50 శాతానికి పైగా ప్రైవేట్ రంగం నుంచి వచ్చింది. గత రెండేళ్లలో భారతీయ రైల్వే నుంచి పెద్ద టెండర్లేవీ రాలేదని, త్వరలోనే 1,00,000 సరుకు రవాణా వ్యాగన్లకు టెండర్ వెలువడే అవకాశం ఉందని లోహియా చెప్పారు. ఆ టెండర్‌లో కనీసం 25 శాతం వాటా కోసం ప్రయత్నిస్తామని, దీనివల్ల రూ.3,000-4,000 కోట్ల అదనపు ఆర్డర్ బుక్ వస్తుందని అంచనా.

BESS విభాగంలో ప్రస్తుతం రూ.600 కోట్ల (500 మెగావాట్ అవర్స్) ఆర్డర్ బుక్ ఉంది. ఈ ఏడాది 1 గిగావాట్ అవర్స్ ఆర్డర్లను సాధించాలని లక్ష్యంగా పెట్టుకున్నామని, వీటి ద్వారా వచ్చే ఆర్థిక సంవత్సరంలో రూ.1,000 కోట్లకు పైగా రెవెన్యూ వస్తుందని వివరించారు. రానున్న 3 ఏళ్లలో 5 గిగావాట్ అవర్స్ ఎగ్జిక్యూషన్ ద్వారా రూ.6,000-8,000 కోట్ల వ్యాపారం సాధ్యమవుతుందని అంచనా.

లుచీనీతో కలిసి ఏర్పాటు చేస్తున్న వీల్ తయారీ వ్యాపారం కోసం రూ.3,000 కోట్లు పెట్టుబడి పెట్టినట్లు తెలిపారు. వచ్చే ఏడాది ఈ యూనిట్ ఉత్పత్తి మొదలుపెట్టనుంది. మొత్తంగా కంపెనీ వ్యాగన్‌లపై ఆధారపడకుండా మొబిలిటీ కంపెనీగా మారాలని లక్ష్యం పెట్టుకుంది. FY28 నాటికి మొత్తం రెవెన్యూలో వ్యాగన్ల వాటా 40 శాతం కంటే తక్కువగా ఉంటుందని చెప్పారు. రైల్వే టెండర్లు వస్తే రాబోయే 2-3 ఏళ్లు ఈ రంగానికి బలమైన అవకాశాలు లభిస్తాయని కంపెనీ అంచనా వేస్తోంది.