జ్యేష్ట మాసం సోమవారాల ప్రత్యేకత: శివారాధనతో చంద్రదోష పరిహారం

హిందూ క్యాలెండర్లో మూడో మాసమైన జ్యేష్ట మాసం మొదలైంది. ఎండలు ఎక్కువగా ఉండే ఈ నెలలో వచ్చే సోమవారాలు శివుడి ఆరాధనకు ప్రత్యేకమైనవని పండితులు చెప్తున్నారు. సోముడు అంటే చంద్రుడిని శివుడు తన తలపై ధరించిన మాసం కావడంతో ఈ సోమవారాలకు ఎంతో ప్రాధాన్యత ఉంది.

పురాణాల ప్రకారం, దక్షుడి శాపం కారణంగా చంద్రుడు కుష్టు వ్యాధితో బాధపడ్డాడు. శాప విమోచన కోసం చంద్రుడు జ్యేష్ట మాసం సోమవారం రోజున శివుడిని ప్రార్థించగా, శివుడు అనుగ్రహించి శాపం నుంచి విముక్తి కల్పించాడు. అప్పటి నుంచి ఈ మాసంలో సోమవారం శివారాధన చేయడం చంద్రదోష పరిహారానికి దారితీస్తుందని విశ్వాసం.

ఈ రోజున సాధారణ పూజలతోపాటు కొన్ని ప్రత్యేకమైన ఆచారాలు కూడా ఉన్నాయి. గుప్పెడు బియ్యాన్ని కొద్దిగా నీటితో తడిపి, ‘శివార్పణమస్తు’ అంటూ శివలింగానికి సమర్పిస్తే మానసిక ప్రశాంతత లభిస్తుందని నమ్మకం. ఇది జాతకంలోని చంద్ర సంబంధమైన దోషాలను తగ్గిస్తుందని జ్యోతిష్యులు చెబుతున్నారు.

అదేవిధంగా, లక్ష్మీదేవికి సోదరుడైన చంద్రుడి ప్రీత్యర్థం శివుడికి పచ్చిపాలతో అభిషేకం చేయడం, ముత్యాలు లేదా పగడాల మాలలతో అలంకరించడం చేస్తే ఇంట్లో ధనధాన్యాలకు కొదవ ఉండదని శాస్త్రాలు చెబుతున్నాయి. జ్యేష్ట మాస సోమవార వ్రతం వల్ల కోపాన్ని అదుపు చేసుకునే మానసిక స్థైర్యం కూడా లభిస్తుందని భక్తులు విశ్వసిస్తున్నారు.