కడప: నాలుగేళ్ల బాలిక నీటి డ్రమ్ములో మృతి, తల్లిదండ్రుల అనుమానం

కడప జిల్లా పులివెందుల నియోజకవర్గం లింగాల మండలం లోపట్టంతుల గ్రామంలో విషాదం చోటు చేసుకుంది. నాలుగేళ్ల బాలిక ఋత్విక నీటి డ్రమ్ములో మృతదేహమై కనిపించింది.

ఋత్విక తల్లిదండ్రులు నాగవీటి రామాచారి, సృజన. గురువారం సాయంత్రం 5 గంటల సమయంలో ఇంటి నుంచి ఆడుకోవడానికి వెళ్ళిన ఋత్విక తిరిగి రాలేదు. కుటుంబ సభ్యులు గాలించగా, సమీపంలోని నీటి డ్రమ్ములో మృతదేహం లభ్యమైంది.

తల్లిదండ్రులు స్థానికంగా నివసించే ఒక మహిళపై అనుమానం వ్యక్తం చేశారు. వారి మధ్య చిన్నపాటి వివాదాలు ఉన్నాయని, దీంతోనే బాలికను చంపి ఉంటారని భావిస్తున్నారు. పోలీసులు ఇప్పటికే కొందరు మహిళలను అదుపులోకి తీసుకున్నారు.

శుక్రవారం బాలిక మృతదేహంతో తల్లిదండ్రులు, బంధువులు పులివెందులలోని పార్ణపల్లి రింగ్ రోడ్డు వద్ద ధర్నా చేపట్టారు. డీఎస్పీ మురళీ నాయక్ సంఘటనా స్థలానికి చేరుకుని వారితో మాట్లాడారు. దోషులను శిక్షిస్తామని, శవపరీక్ష పూర్తి స్థాయిలో నిర్వహిస్తామని హామీ ఇచ్చారు. దీంతో ధర్నా విరమించారు.

శవపరీక్ష నివేదిక ఆధారంగా తదుపరి చర్యలు తీసుకుంటామని పోలీసులు తెలిపారు.