కడప: బీటెక్ విద్యార్థి కిడ్నాప్ – పోలీసులు నిందితులను శ్రీకాళహస్తి వద్ద అరెస్ట్

కడప జిల్లా వల్లూరులో బీటెక్ విద్యార్థి నాగసాయి ప్రణ్య కుమార్ శర్మను కొంతమంది గుర్తు తెలియని వ్యక్తులు కిడ్నాప్ చేశారు. విద్యార్థి తప్పించుకుని పోలీసులకు సమాచారం ఇవ్వడంతో, పోలీసులు చేజింగ్ చేసి నిందితులను శ్రీకాళహస్తి సమీపంలో అరెస్టు చేశారు. నిందితులు పోలీస్ వాహనాన్ని ఢీ కొట్టి పారిపోయే ప్రయత్నం చేశారు.

విద్యార్థి తెలిపిన వివరాల ప్రకారం, సాయంత్రం కొందరు వ్యక్తులు ‘పానీపూరి తిందాం’ అని అతడిని ఇంటి నుంచి పిలిచి, బలవంతంగా కారులో ఎక్కించారు. దారిలో కారు ఆపి, మద్యం మత్తులో ఉన్న ఆ నిందితులు విచక్షణ లేకుండా అతడిని తీవ్రంగా కొట్టారు. కారులో కత్తులు, రాడ్లు ఉన్నాయని, తమను చంపేయడానికి సిద్ధపడ్డారని అతడు ఆరోపించాడు.

చంపేస్తారేమోనని భయపడి, విద్యార్థి మళ్లీ కారు ఎక్కకుండా తప్పించుకుని, గ్రామంలోని మరో వ్యక్తి ఫోన్ నుంచి పోలీసులకు ఫోన్ చేశాడు. పోలీసులు వెంటనే స్పందించి, నిందితుల కారును వెంబడించారు. చేజింగ్‌లో నిందితులు పోలీస్ వాహనాన్ని ఢీకొని, శ్రీకాళహస్తి వైపు పారిపోయారు. అక్కడ పోలీసులు వారిని పట్టుకున్నారు.

నిందితుల్లో ఇద్దరు మహిళలు, ఒక మైనర్ ఉన్నట్లు విద్యార్థి చెప్పాడు. పోలీసులు కేసు నమోదు చేసి దర్యాప్తు చేస్తున్నారు.