కాకినాడ గేట్వే పోర్ట్ నిర్మాణం చివరి దశకు చేరుకుంది

కాకినాడ గేట్వే పోర్ట్ నిర్మాణం చివరి దశకు చేరుకుంది. మొదటి దశలో మూడు బెర్తులు నిర్మిస్తుండగా, ఈ ఏడాది డిసెంబర్ లో కార్యకలాపాలు ప్రారంభించనున్నారు.

కాకినాడ జిల్లా తొండంగి మండలంలో 1650 ఎకరాల స్థలంలో ఈ పోర్టు నిర్మాణం జరుగుతోంది. దక్షిణం వైపు 2700 మీటర్లు, ఉత్తరం వైపు 590 మీటర్ల బ్రేక్ వాటర్ నిర్మాణం పూర్తయింది. ఇది ఆంధ్రప్రదేశ్ లో అత్యంత లోతైన పోర్టు.

మొదటి దశలో ఏడాదికి 16 మిలియన్ టన్నుల కార్గో సామర్థ్యం లభిస్తుంది. బొగ్గు, వ్యవసాయ ఉత్పత్తులు, ఎరువులు, ఖనిజాలు తదితర వస్తువులను దేశ విదేశాలకు రవాణా చేస్తారు. లోతైన నీటి సౌకర్యం ఉండటంతో భారీ నౌకలు నేరుగా బెర్తుల వద్దకు చేరతాయి. సాధారణంగా లోతు తక్కువ పోర్టుల్లో ఇది సాధ్యం కాదు.

పోర్టు నుంచి అన్నవరం వరకు రైల్వే లైన్ నిర్మించనున్నారు. భూసేకరణ పూర్తయింది. ట్రాక్ నిర్మాణం పూర్తయితే సరుకులు వేగంగా రవాణా అవుతాయి.

ఈ పోర్టు లో అడ్వాన్స్డ్ లిక్విడ్ స్టోరేజ్ సదుపాయాలు కల్పిస్తున్నారు. LNG, LPG, కెమికల్స్, పెట్రో కెమికల్స్ నిల్వ ఉంచేందుకు డిజైన్ చేస్తున్నారు. పూర్తి స్థాయిలో పోర్టు అందుబాటులోకి వస్తే తూర్పు తీరంలో అతిపెద్ద పోర్టుగా, సప్లై చైన్ కీలక కేంద్రంగా మారుతుంది.