కాకినాడ: 23 రోజులైనా రెండేళ్ల చిన్నారి జ్ఞానేశ్వరి ఆచూకీ లేదు

కాకినాడ జిల్లా తుని ప్రాంతంలో రెండేళ్ల చిన్నారి జ్ఞానేశ్వరి అదృశ్యమై 23 రోజులు పూర్తయింది. ఇప్పటివరకు పోలీసులు, క్రైం బ్రాంచ్ బృందాలు తీవ్రంగా గాలించినా ఎలాంటి ఆచూకీ దొరకలేదు.

ఈ కేసులో పెంపుడు శునకం మృతి కూడా దర్యాప్తులో భాగంగా మారింది. జ్ఞానేశ్వరి తప్పిపోయిన సమయంలో ఊరిలో ఒక కెమెరాలో ఆ కుక్క తిరుగుతున్న దృశ్యాలు నమోదయ్యాయి. దాని పోస్ట్‌మార్టం నివేదిక రావాల్సి ఉంది. పోలీసులు ఈ కోణాన్ని కూడా పరిశీలిస్తున్నారు.

చుట్టుపక్కల అడవులు, కొండ ప్రాంతాలన్నింటినీ జల్లెడ పట్టినా ఏ ఆధారం లభించకపోవడంతో కిడ్నాప్ అయ్యే అవకాశమే ఎక్కువగా కనిపిస్తోంది. దీంతో తుని, కాకినాడ సహా చుట్టుపక్కల పట్టణాల్లోని సీసీ కెమెరాల పుటేజీని పోలీసులు విస్తృతంగా పరిశీలిస్తున్నారు. టెక్నికల్ ఎవిడెన్స్ సేకరణ కూడా కొనసాగుతోంది.

తల్లిదండ్రులు తీవ్ర మనో వేదనకు గురవుతున్నారు. జ్ఞానేశ్వరి తల్లి అనారోగ్యం పాలైంది. ఈ క్రమంలో ఒక జ్యోతిష్యుడు స్వయంగా ఇంటికి వచ్చి, చిన్నారి ప్రాణాలతోనే ఉందని, సెప్టెంబర్ నాటికి తిరిగి వస్తుందని చెప్పడంతో కుటుంబసభ్యులకు కొంత ధైర్యం వచ్చిందని వారు చెబుతున్నారు. అయితే, పోలీసు దర్యాప్తు మాత్రం కిడ్నాప్ కోణంపైనే కేంద్రీకృతమై ఉంది.