కాకినాడలో భారీ వర్షం: రైల్వే స్టేషన్ రోడ్డు, ఆర్టీసీ కాంప్లెక్స్ నీట మునిగాయి

కాకినాడ జిల్లాలో వరుస తుఫాన్ల ప్రభావంతో భారీ వర్షాలు కురుస్తున్నాయి. కాకినాడ రైల్వే స్టేషన్ రోడ్డు, ఆర్టీసీ కాంప్లెక్స్ పూర్తిగా నీట మునిగాయి. గత కొన్ని రోజులుగా ఇదే పరిస్థితి కొనసాగుతోంది.

కాకినాడ, పెద్దాపురం, సామర్లకోట, అన్నవరం, తుని, పిఠాపురం, జగ్గంపేట ప్రాంతాల్లో తుఫాను ప్రభావం కనిపిస్తోంది. లోతట్టు ప్రాంతాలన్నీ జలమయం అయ్యాయి. చాలా కాలనీల్లో మోకాళ్ల లోతు వరకు నీరు నిలిచింది. డ్రైనేజీ నీరు, వర్షపు నీరు కలిసిపోవడంతో పరిస్థితి మరింత దిగజారింది.

ఏలేరు కాల్వకు కొన్ని చోట్ల ఆక్రమణలు ఉండడంతో నీరు రోడ్లపైకి వస్తోంది. దీంతో కాకినాడ–సామర్లకోట మెయిన్ రోడ్డు పూర్తిగా బ్లాక్ అయ్యింది. భారీ ఈదురుగాలులకు చేతికి వచ్చిన పంట నీట మునిగింది.

రైల్వే స్టేషన్ పక్కన ఉన్న రోడ్డు చెరువును తలపిస్తోంది. రైలు దిగిన ప్రయాణికులు నీటిలో నడుచుకుంటూ బయటకు రావాల్సిన పరిస్థితి ఉంది. ఆర్టీసీ కాంప్లెక్స్ లోతట్టు ప్రాంతంలో ఉండడంతో చిన్న వర్షానికే నీరు చేరుతోంది. ద్విచక్ర, నాలుగు చక్రాల వాహనాలు నీటిలో నిలిచిపోతున్నాయి.

జిల్లా కలెక్టర్ ప్రభుత్వ, ప్రైవేటు పాఠశాలలు, కళాశాలలు, అంగన్వాడీ కేంద్రాలకు సెలవు ప్రకటించారు. సెలవు ఆలస్యంగా ప్రకటించడంతో కొంతమంది విద్యార్థులు ఇంకా పాఠశాలలకు వెళ్తున్నారు. జిల్లా వ్యాప్తంగా సాయంత్రం వరకు భారీ వర్షాలు కురుస్తాయని IMD హెచ్చరిక జారీ చేసింది. రైళ్ల రాకపోకలు మాత్రం యథావిధిగా కొనసాగుతున్నాయి.