కాకినాడ లోతట్టు కాలనీలు వరద నీటిలోనే; స్థానికులకు తీవ్ర ఇబ్బందులు

కాకినాడ జిల్లాలో భారీ వర్షాల తర్వాత కూడా కొన్ని లోతట్టు కాలనీలు వరద నీటిలోనే ఉన్నాయి. వర్షం తగ్గి రెండు రోజులు అయినా నీరు పూర్తిగా తగ్గలేదు.

కాకినాడ రూరల్ తిమ్మాపురం సమీపంలో కొత్తగా ఏర్పడిన కాలనీలు జలమయమయ్యాయి. కాలవలకు గండ్లు పడటంతో పరిసర ఇళ్లలోకి నీరు వచ్చింది. కొందరు ఇళ్లు ఖాళీ చేసి వేరే ప్రాంతాలకు వెళ్లారు. వెళ్లలేని వారు ఇళ్లలోనే ఉంటున్నారు.

బయటకు వెళ్లేందుకు రోడ్లపై నీరు ఉండటంతో స్థానికులు తీవ్ర ఇబ్బందులు పడుతున్నారు. నిత్యావసర సరుకులు, ఆహారం కొనుగోలు చేయలేకపోతున్నారు. పాములు, తేళ్లు, కప్పలు ఇళ్లలోకి వస్తున్నాయని స్థానికులు చెప్పారు.

కూలి పనులు చేసుకునే కుటుంబాలకు ఆదాయం లేదు. పది రోజులుగా పనులు లేవని, అప్పు చేసి బియ్యం తెచ్చుకున్నామని స్థానికులు తెలిపారు. అధికారులు వచ్చి పరిస్థితిని పరిశీలించలేదని వారు పేర్కొన్నారు. ప్రాంతంలో రోడ్లు, కాలవలు సరిగా చేయాలని కోరుతున్నారు.