ఎన్విడియా AI చిప్పుల చైనా తరలింపు ఆరోపణలపై స్వతంత్ర విచారణకు ఆదేశం

అమెరికా నిషేధం ఉన్నప్పటికీ భారీ సంఖ్యలో ఎన్విడియా AI చిప్పులు చైనాకు తరలించబడ్డాయన్న ఆరోపణలపై కంపెనీ స్వతంత్ర విచారణకు ఆదేశించింది. అమెరికాకు చెందిన ద ఇన్ఫర్మేషన్ ప్రచురించిన పరిశోధనా కథనం ఆధారంగా ఈ విచారణ జరుగుతోంది.

కథనం ప్రకారం, షాంగ్‌హైకి చెందిన సెంచురీ లెటాంగ్ అనే సంస్థను కేంద్రంగా చేసుకుని చైనా, సింగపూర్‌లలో కంపెనీల నెట్‌వర్క్ ఏర్పాటు చేశారు. 2023 జూన్‌లో ప్రారంభమైన ఈ సంస్థ అదే ఏడాది అక్టోబర్ నాటికి ఎన్విడియా ప్రాధాన్యత కలిగిన క్లౌడ్ పార్టనర్ల జాబితాలో చేరింది. దీనివల్ల చిప్పులు వేగంగా సేకరించే అవకాశం లభించిందని కథనం పేర్కొంది.

గత రెండేళ్లలో దాదాపు 2.4 లక్షల నిషేధిత చిప్పులు చైనాకు తరలించినట్లు నివేదిక అంచనా వేసింది. 2023 నుంచి 2025 మధ్య మెగా స్పీడ్ ద్వారా 4.6 బిలియన్ డాలర్లు, స్పీడ్ మ్యాట్రిక్స్ ద్వారా మరో 2 బిలియన్ డాలర్ల విలువైన చిప్పులు ఎగుమతి అయ్యాయని తెలిపింది. మొత్తం విలువ 7.5 బిలియన్ డాలర్లు, అంటే సుమారు ₹70 వేల కోట్లకు పైగా ఉంటుందని అంచనా.

ఇండోనేషియాలోని మెగా స్పీడ్ అనుబంధ సంస్థ, GigaByte సబ్సిడరీ అయిన Giga Computing వంటి సరఫరాదారుల నుంచి H100 ప్రాసెసర్లను దిగుమతి చేసుకున్నట్లు కూడా కథనం చెబుతోంది. చైనాకు H100 చిప్పుల ఎగుమతిపై అమెరికా నిషేధం విధించింది. కానీ ఇండోనేషియాకు జరిగిన రవాణా సాంకేతికంగా నిబంధనల ఉల్లంఘన కిందకు రాదు.

జెన్సెన్ హువాంగ్‌తో ఉన్న వ్యక్తిగత పరిచయాన్ని ఉపయోగించుకుని మార్కెట్‌లో అరుదైన చిప్పులు సేకరించినట్లు కూడా ఆ కథనంలో ఆరోపణ ఉంది. ఆమెను చైనా గూఢచారి వ్యవస్థతో అనుసంధానం చేస్తూ కూడా అందులో ప్రస్తావన ఉంది. ఈ ఆరోపణలపై ఇప్పటివరకు ఎలాంటి అధికారిక నిర్ధారణ జరగలేదు.

ఈ అంశంపై దర్యాప్తు చేయడానికి ఎన్విడియా రోసెన్ అండ్ కట్స్ అనే సంస్థను నియమించుకుంది. ఆర్థిక నేరాలు, మోసాల కేసులను విచారించడంలో ఈ సంస్థకు అనుభవం ఉంది. 2021లో న్యూయార్క్ మాజీ గవర్నర్ ఆండ్రూ క్యూమోపై వచ్చిన లైంగిక వేధింపుల ఆరోపణలను కూడా ఈ సంస్థలోని ఒక పార్టనర్ దర్యాప్తు చేశారు.