కాకినాడ: జాహ్నవి ఆచూకీ కోసం పోలీసులు వీధి కుక్కకు GPS ట్రాకర్ అమర్చి పంపించారు

కాకినాడ జిల్లా తుని నియోజకవర్గంలోని సిహెచ్ అగ్రహారంలో ఐదు రోజులుగా తప్పిపోయిన బాలిక జాహ్నవి (8) ఆచూకీ కోసం పోలీసులు కొత్త ప్రయత్నం చేపట్టారు. సందర్శించిన ప్రాంతంలో ఒక వీధి కుక్కను పట్టుకుని, ఆ కుక్కకు GPS ట్రాకర్ అమర్చి తిరిగి వదిలేశారు.

పోలీసులు తెలిపిన వివరాల ప్రకారం, జాహ్నవి ఐదు రోజుల కిందట నుండి గల్లంతైంది. సిహెచ్ అగ్రహారం సమీపంలోని 40 ఎకరాల తోట, దట్టమైన కొండలతో కూడిన ప్రాంతంలో గాలింపు చేపట్టారు. ఈ ప్రాంతానికి చుట్టూ ఫెన్సింగ్ ఉండటంతో, ఎవరూ బయటికి వెళ్లలేదని భావించారు.

ఈ క్రమంలోనే వీధి కుక్క పదేపదే ఈ ప్రాంతానికి రావడం, వెళ్లడం గమనించారు. నిన్న రాత్రి 12 గంటల సమయంలో వలల సహాయంతో ఆ కుక్కను పట్టుకుని, ఒక బోనులో బంధించారు. కుక్క భయంకరంగా ప్రవర్తించినా, పట్టుకోగలిగారు.

పోలీసులు ఆ కుక్కకు GPS ట్రాకింగ్ పరికరం అమర్చి, తిరిగి లోపలికి పంపించారు. ఈ కుక్క ఎటు వెళ్తుందో ట్రాకింగ్ ద్వారా గమనించి, ఆ దారిలో బాలిక ఆచూకీ దొరుకుతుందేమోనని ఆశిస్తున్నారు. గతంలో పులులకు ట్రాకింగ్ కాలర్ అమర్చిన తరహాలో ఈ ప్రయోగం చేస్తున్నట్లు తెలిపారు.