కాల్వబుగ్గ రామేశ్వర స్వామి ఆలయ కోనేరు ఎండిపోవడంతో భక్తుల ఆందోళన

కర్నూలు జిల్లాలోని ప్రసిద్ధ శైవ క్షేత్రం కాల్వబుగ్గ రామేశ్వర స్వామి ఆలయంలో ఏర్పడిన పరిణామం భక్తులను ఆందోళనకు గురి చేస్తోంది. ఆలయంలో ఏళ్ల తరబడి ప్రవహిస్తూ వచ్చిన సహజ నీటి ఊట ఇటీవల ఎండిపోయింది. దీంతో కోనేరు ఖాళీ అయింది, ఆలయ ప్రాంగణం నిర్మానుష్యంగా మారింది.

సుమారు 200 ఏళ్లుగా ఈ ఆలయంలోని కోనేరు నిండుగా ఉండేది. ఆ నీరు ఆలయ అవసరాలతో పాటు 300 ఎకరాల సాగుకు, చుట్టుపక్కల గ్రామాల తాగునీటికి ఉపయోగపడేది. భక్తులు ఈ కోనేటిలో స్నానం చేసి స్వామి దర్శనం చేసుకునేవారు. ప్రస్తుతం నీటి ప్రవాహం పూర్తిగా నిలిచిపోయింది.

ఆలయ అర్చకులు, స్థానికులు మాట్లాడుతూ, వర్షాభావం, చుట్టుపక్కల పెరిగిన బోర్ల సంఖ్య, మైనింగ్ తదితర కారణాల వల్ల భూగర్భ జలాలపై ఒత్తిడి పెరిగి ఈ పరిస్థితి ఏర్పడిందని చెబుతున్నారు. అయితే అదే ప్రాంతంలోని మహానంది ఆలయంలో సహజ నీటి ప్రవాహం ఇప్పటికీ కొనసాగుతోంది. కాల్వబుగ్గ ఆలయంలో మాత్రం ఇప్పుడు నీటి కొరత తీవ్రంగా ఉందని, గతంలో జరిగిన శుభకార్యాలు, వివాహాలు ప్రస్తుతం జరగడం లేదని భక్తులు ఆవేదన వ్యక్తం చేస్తున్నారు.