కామారెడ్డి జిల్లాలో భూ వివాదం: రైతు హత్య కేసు 24 గంటల్లో చేధించిన పోలీసులు

కామారెడ్డి జిల్లా లింగాపూర్ గ్రామంలో రైతు రాజురెడ్డి హత్యకు గురయ్యారు. భూ కొనుగోలు వివాదంలో డబ్బులు చెల్లించలేదన్న కోపంతో ఎల్లయ్య, అతని కుమారుడు ప్రణీత్ కలిసి ఈ హత్య చేసినట్లు పోలీసులు తేల్చారు.

రెండు రోజుల క్రితం రాజురెడ్డి కనిపించకుండా పోయాడు. కుటుంబ సభ్యులు వెతికి ఆచూకీ లభించకపోవడంతో పోలీసులకు మిస్సింగ్ ఫిర్యాదు చేశారు. దర్యాప్తు చేపట్టిన పోలీసులు గ్రామ సమీపంలోని ఓ పాడుబడ్డ బావిలో గోనె సంచిలో మృతదేహాన్ని గుర్తించారు. మృతదేహాన్ని వెలికి తీసి విచారణ ప్రారంభించగా ఎల్లయ్య, ప్రణీత్‌లను అనుమానితులుగా అదుపులోకి తీసుకున్నారు.

విచారణలో నిందితులు హత్యకు కారణాన్ని ఒప్పుకున్నారు. ఎల్లయ్య తన 21 గుంటల భూమిని రాజురెడ్డికి ₹1.20 కోట్లకు విక్రయించేందుకు ఒప్పందం చేసుకున్నాడు. ఈ క్రమంలో రాజురెడ్డి ₹28 లక్షలు చెల్లించాడు. మిగిలిన డబ్బులు విడతల వారీగా చెల్లించాల్సి ఉండగా, అతను ఇవ్వలేదు. దీంతో వివాదం తలెత్తింది.

హత్య పథకం ప్రకారం, ఎల్లయ్య, ప్రణీత్ రాజురెడ్డిని తమ ఇంటి వెనుక పశువుల కొట్టం వద్దకు పిలిచారు. అక్కడ రాడ్‌తో అతని మెడపై కొట్టి, గొంతు నులిమి చంపేశారు. మృతదేహాన్ని గోనె సంచిలో పెట్టి, పాడుబడ్డ బావిలో పూడ్చిపెట్టారు. అతని బైక్‌ను ఊరి అవతల ఓ ఫంక్షన్ హాల్‌లో వదిలేశారు.

పోలీసులు 24 గంటల్లోనే కేసును చేధించారు. నిందితులను అరెస్ట్ చేసి రిమాండ్‌కు తరలించారు. భూ కొనుగోలు వివాదం ఇద్దరు రైతు కుటుంబాలను రోడ్డున పడేసిందని స్థానికులు వాపోతున్నారు.