పల్నాడు: ఓటు పెట్టెలో ఓటుతో పాటు గ్రామ సమస్యల పత్రం వేసిన కంకనాలపల్లి గ్రామస్తులు

పల్నాడు జిల్లా సత్తెనపల్లి మండలం కంకనాలపల్లి గ్రామస్తులు ఓటు వేసిన బ్యాలెట్ పెట్టెలో తమ గ్రామ సమస్యల పత్రాన్ని కూడా వేశారు. ఇటీవల జరిగిన MPTC, ZPTC ఎన్నికల పోలింగ్‌లో ఈ ఘటన చోటు చేసుకుంది.

ఆ పత్రంలో ముఖ్యమంత్రి, ఉపముఖ్యమంత్రి, మంత్రి నారా లోకేష్‌తో పాటు స్థానిక ప్రజాప్రతినిధులకు, అధికారులకు విజ్ఞప్తులు పేర్కొన్నారు. గ్రామానికి నేరుగా ఉన్న రహదారిపై రైల్వే యూ ఆకారంలో కొత్త నిర్మాణం చేపడుతోందని గ్రామస్తులు తెలిపారు.

యూ ఆకారంలో నిర్మిస్తే తమ గ్రామానికి తీవ్ర ఇబ్బందులు కలుగుతాయని వారు పేర్కొన్నారు. ప్రస్తుతం ఉన్న రహదారిలోనే రైల్వే అండర్‌పాస్ నిర్మించాలని కోరారు. తమ గ్రామాన్ని కాపాడాలని కరపత్రంలో విజ్ఞప్తి చేశారు.

గతంలో పలుమార్లు అధికారులకు అర్జీలు ఇచ్చినా సమస్య పరిష్కారం కాలేదని స్థానికులు చెబుతున్నారు. అందుకే ఈసారి ఓటు ద్వారా తమ సమస్యను తెలియజేశారని వారు వివరించారు. ఈ పత్రాన్ని ఎన్నికల అధికారులు ప్రభుత్వం దృష్టికి తీసుకెళ్తున్నట్టు తెలుస్తోంది.