ధార్వాడ్‌లో డాక్టర్ కిరణ్ హత్య; భార్య ప్రియాంక అదుపులో, కుమారుడు ప్రాణాపాయ స్థితిలో

కర్ణాటకలోని ధార్వాడ్‌లో డాక్టర్ కిరణ్ హొన్నన్నవార్ (అనస్థీషియా నిపుణుడు) తన అపార్ట్‌మెంట్‌లో హత్యకు గురైనట్లు పోలీసులు తెలిపారు. ఆయన ఎనిమిదేళ్ల కుమారుడు కత్తి పోట్లతో తీవ్రంగా గాయపడి ఆసుపత్రిలో చికిత్స పొందుతున్నాడు. డాక్టర్ కిరణ్ భార్య, నేత్రవైద్యురాలు ప్రియాంకను పోలీసులు అదుపులోకి తీసుకున్నారు.

కుటుంబ సభ్యులు ఉదయం నుంచి కిరణ్‌కు ఫోన్ చేసినా స్పందించలేదు. భార్య ప్రియాంకకు ఫోన్ చేస్తే, భర్త విశ్రాంతి తీసుకుంటున్నారని, బయటికి వెళ్లారని విరుద్ధ సమాధానాలు ఇచ్చింది. దీంతో సాయంత్రం బంధువులు స్వయంగా అపార్ట్‌మెంట్‌కు వెళ్లగా, కిరణ్ హాల్లో రక్తపు మడుగులో చనిపోయి కనిపించారు. పక్క గదిలో కుమారుడు అపస్మారక స్థితిలో పడి ఉన్నాడు. పోలీసులు ఘటనా స్థలానికి చేరుకొని బాలుడిని వెంటనే ఆసుపత్రికి తరలించారు.

అపార్ట్‌మెంట్ చుట్టూ భారీ భద్రత ఉండటం, సీసీటీవీలో అనుమానితుల ఆనవాలు లేకపోవడంతో బయటి వ్యక్తులు ప్రవేశించినట్లు ఆధారాలు లభించలేదు. ఈ ఘటనపై పోలీసులు కేసు నమోదు చేసి దర్యాప్తు ప్రారంభించారు. భార్య ప్రియాంక షాక్‌లో ఉన్నట్లు పోలీసులు పేర్కొన్నారు. డాక్టర్ కిరణ్ పోస్టుమార్టం రిపోర్టు వచ్చేంత వరకు మరణానికి సంబంధించిన పూర్తి వివరాలు తెలియాల్సి ఉంది.