చిత్తూరు జిల్లాలో భర్తను హత్య చేసిన భార్య, ప్రియుడు అరెస్ట్

చిత్తూరు జిల్లా గుడిపల్లె మండలంలోని మల్లప్పకొండ మల్లేశ్వర స్వామి ఆలయ సమీపంలో భర్తను హత్య చేసిన కేసులో భార్య, ఆమె ప్రియుడితో సహా ముగ్గురు నిందితులను పోలీసులు అరెస్టు చేశారు.

మృతుడు తమిళనాడులోని హోసూరుకు చెందిన రమేష్. ఆయన కుప్పం నియోజకవర్గంలోని బోయినపల్లెకు చెందిన హాసినిని వివాహం చేసుకున్నారు. వీరికి ఏడాది వయసున్న కుమార్తె ఉంది. హాసినికి మరో వ్యక్తితో వివాహేతర సంబంధం ఉందని, అది భర్తకు తెలియడంతో ఆమె హత్యకు పథకం వేసినట్లు పోలీసులు తెలిపారు.

పుట్టింటికి వెళ్తామని చెప్పి భర్తను ఒప్పించి, మార్గమధ్యంలో మల్లప్పకొండ ఆలయానికి తీసుకెళ్లింది. ఆలయం వద్ద ఉన్న ఘాట్ రోడ్డు అటవీ ప్రాంతంలో ముందే ఆమె ప్రియుడు, మరో వ్యక్తిని ఉండేలా ప్లాన్ చేసింది. ముగ్గురు కలిసి రమేష్ పై దాడి చేసి హత్య చేశారు.

హత్య అనంతరం హాసిని, ప్రియుడు, మరో నిందితుడు కలిసి రమేష్ బైక్ పై పారిపోయారు. రాత్రి అయినా రమేష్ ఇంటికి రాకపోవడంతో హాసిని కుటుంబ సభ్యులు పోలీసులకు ఫిర్యాదు చేశారు.

సిసిటీవీ ఫుటేజీలో రమేష్, హాసిని, మరో యువకుడు కలిసి వెళ్తున్న దృశ్యాలు లభించాయి. తిరిగి వచ్చే సమయంలో రమేష్ లేకుండా హాసిని మరో ఇద్దరితో బైక్ మీద వెళ్తున్నట్లు కనిపించింది. ఈ ఆధారాలతో అటవీ ప్రాంతంలో గాలించగా రమేష్ మృతదేహం లభ్యమైంది.

ప్రస్తుతం పోలీసులు హాసినితో పాటు మిగిలిన నిందితులను అదుపులోకి తీసుకుని దర్యాప్తు చేస్తున్నారు. నిందితులు హత్య చేసినట్లు ఒప్పుకున్నారు. కోర్టులో హాజరుపరిచి రిమాండ్ కు తరలించనున్నట్లు పోలీసులు తెలిపారు. కాల్ డేటా, కదలికల వివరాలు విశ్లేషిస్తున్నారు.