కార్తీక శుక్ల తదియ: త్రిలోచన గౌరీ వ్రతం, కార్తీక స్నానం విశేషాలు

నవంబర్ 12, గురువారం కార్తీక మాసంలో మూడో రోజు. ఈ రోజు కార్తీక శుక్ల పక్ష తదియ తిథి. ఈ తిథి రోజు త్రిలోచన గౌరీ వ్రతం ఆచరించి శివపార్వతులను పూజించాలని ధర్మశాస్త్ర గ్రంథాల్లో చెప్పబడింది.

త్రిలోచన గౌరీ వ్రతం వెనుక ఒక పురాణ కథ ఉంది. ఒక రాక్షసుడు దేవతలను, ఋషులను తీవ్రంగా ఇబ్బంది పెట్టాడు. అప్పుడు దేవతలు శివపార్వతులను ప్రార్థించారు. ఆ సమయంలో శివపార్వతులు అర్ధనారీశ్వర రూపంలో ఉన్నారు. రాక్షసుడి అకృత్యాలకు కోపగించిన వారు మూడో నేత్రాన్ని తెరిచారు. ఆ నేత్రం నుంచి వచ్చిన అగ్ని రాక్షసుడిని దహనం చేసిందని పురాణ గ్రంథాలు చెప్తున్నాయి. ఆ రోజే కార్తీక శుక్ల తదియ అని చెబుతారు.

ఈ రోజు మహిళలు గౌరీదేవిని పూజిస్తారు. తమలపాకుపై పసుపు ముద్దను ఉంచి, దానిపై కుంకుమ బొట్లు పెట్టి గౌరీ స్వరూపంగా భావిస్తారు. అక్షతలు, పువ్వులతో పూజించి 'ఓం త్రిలోచన గౌరీ దేవ్యై నమః' అనే మంత్రాన్ని లేదా గౌరీ అష్టోత్తరాన్ని చదువుతారు. ఆ తర్వాత నైవేద్యం పెడతారు. అర్ధనారీశ్వర రూపంలో ఉన్న శివపార్వతుల చిత్రపటం ముందు దీపారాధన చేసి పూజించవచ్చని కూడా చెప్పబడింది. ఈశ్వరుడికి జలాభిషేకం చేయడం ద్వారా శివపార్వతుల అనుగ్రహం కలుగుతుందని పురాణాలు పేర్కొంటున్నాయి.

కార్తీక మాసంలో స్నానానికి ప్రత్యేక ప్రాధాన్యత ఉంది. సూర్యుడు తులా రాశిలోకి ప్రవేశించగానే కార్తీక మాసం మొదలవుతుంది. ఆ సమయంలో ముల్లోకాలను పవిత్రం చేసే గంగ భూమిపై ఉన్న సమస్త జలాల్లో ఉంటుందని స్కాంద పురాణం, తులా పురాణంలోని శ్లోకం చెబుతోంది. అందుకే సూర్యోదయానికి ముందు స్నానం చేయాలని చెప్తారు. నదుల్లో వీలుకాకపోతే ఇంట్లో స్నానం చేయవచ్చు.

శాస్త్రాల ప్రకారం స్నానం సమయంలో 'తులారాశిం గతే సూర్యే...' అనే శ్లోకం చదవాలి. చదవలేని వారు 'కార్తీక దామోదర ప్రీత్యర్థం' అనుకుంటూ స్నానం చేయవచ్చు. సప్త నదులను స్మరించే శ్లోకం చదివినా సర్వ పుణ్య నదుల్లో స్నానం చేసిన ఫలితం లభిస్తుందని పురాణాలు చెప్తున్నాయి. తెల్లవారుజామున స్నానం చేయలేని వారు కావేరీ నదిలో స్నానం చేస్తున్నానని భావించినా సరిపోతుందని స్కాంద పురాణం పేర్కొంటోంది.