పార్లమెంటును 543 సీట్లకే పరిమితం చేయాలి: కార్తి చిదంబరం

తమిళనాడు అసెంబ్లీ ఆమోదించిన ‘పార్లమెంట్ సీట్ల సంఖ్య 543కే పరిమితం చేయాలి’ అనే తీర్మానానికి కాంగ్రెస్ ఎంపీ కార్తి చిదంబరం మద్దతు తెలిపారు. పెద్ద పార్లమెంట్ ప్రభావం తగ్గుతుందని, సభ్యులకు చర్చలకు సమయం లభించదని ఆయన హెచ్చరించారు. ప్రస్తుతం 543 మంది సభ్యులతోనే సభలో మాట్లాడేందుకు తగినంత సమయం దొరకడం లేదని, పార్లమెంట్ సమావేశ రోజుల సంఖ్య కూడా క్రమంగా తగ్గుతోందని ఆయన వివరించారు. ఈ పరిస్థితిలో సీట్లు పెంచితే అర్థవంతమైన చర్చ, బిల్లులపై నిశిత పరిశీలన జరగడం కష్టమని కార్తి చిదంబరం తెలిపారు. ప్రజాస్వామ్యాన్ని బలోపేతం చేయాలంటే కేవలం సంఖ్యలు పెంచడం సరిపోదని, చురుకైన భాగస్వామ్యం, చర్చ, పరిశీలన అవసరమని ఆయన పేర్కొన్నారు. రాష్ట్రాల ప్రాతినిధ్యం విషయంలో ప్రస్తుతం ఉన్న నిష్పత్తిని యథాతథంగా కొనసాగించాలని డిమాండ్ చేశారు. అదే సమయంలో, 543 సీట్లలో 181 సీట్లు మహిళలకు రిజర్వ్ చేయాలని, మహిళా రిజర్వేషన్ బిల్లును వెంటనే అమలు చేయాలని కార్తి చిదంబరం అన్నారు. ఆ బిల్లు ఇప్పటికే పార్లమెంట్ ఆమోదం పొందిందని, దానిని నోటిఫై చేసి అమలు చేయడానికి ప్రభుత్వానికి ఎలాంటి అడ్డంకి లేదని తెలిపారు. అయితే, మహిళా రిజర్వేషన్ బిల్లుకు సంబంధించిన నోటిఫికేషన్ ఇంకా జారీ కాలేదు.