కావేరి యూనివర్సిటీలో డీజీసీఏ అనుమతితో డ్రోన్ ట్రైనింగ్ అకాడమీ

కావేరి యూనివర్సిటీ తన స్కూల్ ఆఫ్ అగ్రికల్చర్లో విద్యార్థుల కోసం డ్రోన్ ట్రైనింగ్ అకాడమీని ప్రారంభించింది. డైరెక్టర్ జనరల్ ఆఫ్ సివిల్ ఏవియేషన్ (డీజీసీఏ) నుంచి అనుమతి పొందిన తర్వాత ఈ అకాడమీని ఏర్పాటు చేసినట్లు యూనివర్సిటీ వర్గాలు తెలిపాయి.

ఈ శిక్షణా కార్యక్రమం ఐదు రోజుల పాటు నిర్వహిస్తారు. మొదటి రెండు రోజులు డ్రోన్లకు సంబంధించిన సిద్ధాంత పాఠాలు, వాతావరణ పరిస్థితిని ఎలా ఉపయోగించాలనే అంశంపై తరగతులు నిర్వహిస్తారు. మూడో రోజు హార్డ్వేర్ ల్యాబ్లో డ్రోన్ పార్ట్లను గుర్తించడం, చిన్న సమస్యలను పరిష్కరించే విధానం నేర్పిస్తారు.

నాలుగో రోజు సాఫ్ట్వేర్ ల్యాబ్లో సిమ్యులేటెడ్ ఫ్లయింగ్ ద్వారా విద్యార్థులు డ్రోన్ నడిపే నైపుణ్యాన్ని అలవర్చుతారు. అన్ని పరీక్షల్లో ఉత్తీర్ణులైన అనంతరం మైదానంలో నేరుగా డ్రోన్ను ఫ్లై చేసే అవకాశం కల్పిస్తారు. ఇప్పటికే రెండు, మూడు బ్యాచ్లకు శిక్షణ పూర్తయిందని యూనివర్సిటీ ప్రతినిధి తెలిపారు.

గతంలో వ్యవసాయంలో ఎడ్ల నుంచి ట్రాక్టర్లు, డీజిల్ మోటార్లు, యంత్రాలతో పంటలు వేయడం వంటి మార్పులు వచ్చాయని ఆయన వివరించారు. ప్రస్తుతం డ్రోన్ టెక్నాలజీతో పంట పర్యవేక్షణ, పురుగుమందుల పిచికారీ వంటి పనులు సులభమైనట్లు పేర్కొన్నారు. ఈ శిక్షణ వల్ల విద్యార్థులు ఆధునిక వ్యవసాయంలో కెరీర్ అవకాశాలను మెరుగుపరచుకోవచ్చని యూనివర్సిటీ వర్గాలు తెలిపాయి.