కావేరీ యూనివర్సిటీలో డ్రోన్ టెక్నాలజీతో పంట పురుగుల నిర్వహణ విద్య

కావేరీ యూనివర్సిటీలో విద్యార్థులకు పురుగుల నిర్వహణ పాఠాలు సాంప్రదాయ పద్ధతులతో పాటు ఆధునిక టెక్నాలజీని ఉపయోగించి బోధిస్తున్నారు.

ముందుగా థియరీ క్లాసులో విద్యార్థులకు రక్షిత నమూనాలను చూపుతారు. ఏ పురుగు మిత్రుడు, ఏది శత్రువు, వాటి ఆహారపు అలవాట్లు, పునరుత్పత్తి వంటి బేసిక్స్ నేర్పుతారు. తర్వాత విద్యార్థులను నేరుగా పొలంలోకి తీసుకెళ్లి మొక్కలపై ఉన్న పురుగులను గుర్తించేలా చేస్తారు. ఏ మందు వాడాలి, ఎంత మోతాదులో, ఏ స్ప్రేయర్‌తో పిచికారీ చేయాలి అన్నది ఫీల్డ్ లెవల్లో నేర్పిస్తారు.

ఇప్పుడు డ్రోన్ టెక్నాలజీతో కొత్త విధానం అమలు చేస్తున్నట్లు అధ్యాపకులు తెలిపారు. మల్టీ స్పెక్ట్రల్ కెమెరాలు అమర్చిన డ్రోన్ పొలంపై ఎగిరి, చిత్రాలను తీసుకుని, ఏ ప్రాంతంలో ఎక్కువ పురుగులు ఉన్నాయో గుర్తిస్తుంది. పురుగు ఉన్న ప్యాచ్‌లో మాత్రమే మందు పిచికారీ చేయడం వల్ల రసాయన వాడకం తగ్గింది, ఖర్చు ఆదా అయింది. గతంలో మొత్తం పంటపై మందు కొట్టేవారు. తద్వారా అనవసరంగా టాక్సిసిటీ పెరిగేది. డ్రోన్ ద్వారా కచ్చితమైన ప్రదేశంలో మాత్రమే స్ప్రే చేయడంతో మొక్కలకు హాని తగ్గుతుందని బోధిస్తున్నామని వారు వివరించారు.

ఈ విధానం విద్యార్థులకు సరికొత్త ఆధునిక వ్యవసాయ పద్ధతులను అర్థం చేసుకోవడానికి ఉపయోగపడుతోంది.