కేరళలో భారీ డ్రగ్స్ రాకెట్ ఛేదించిన పోలీసులు: 7 అరెస్ట్, 308 గ్రాముల MDMA స్వాధీనం

కేరళలోని త్రిసూర్ జిల్లాలో పోలీసులు పెద్ద డ్రగ్స్ నెట్వర్క్‌ను ఛేదించారు. ఈ ఆపరేషన్‌లో ఇద్దరు మహిళలతో పాటు మొత్తం ఏడుగురిని అరెస్టు చేశారు. నిందితుల నుంచి 308 గ్రాముల నిషేధిత MDMA డ్రగ్స్ స్వాధీనం చేసుకున్నారు.

యాంటీ నార్కోటిక్ స్పెషల్ యాక్షన్ ఫోర్స్ పోలీసులు వాహన తనిఖీలు నిర్వహిస్తుండగా, పాలక్కాడు నుంచి వస్తున్న ఓ స్విఫ్ట్ కారును ఆపి సోదా చేశారు. కారులో ఉన్న ఓ మహిళ తన రహస్య భాగాల్లో 2 గ్రాముల MDMA డ్రగ్స్ దాచి ఉండటాన్ని గుర్తించారు. వెంటనే ఆమెతో సహా కారులోని ముగ్గురు మహిళలను అదుపులోకి తీసుకున్నారు.

విచారణలో నిందితుల నెట్వర్క్ గురించి మరింత సమాచారం లభించింది. నిందితుడు షిఫాస్ ఇంట్లో సోదా చేయగా మరో 18 గ్రాముల MDMA స్వాధీనమైంది. ఈ సమాచారం ఆధారంగా చావకాడ్ సమీపంలోని ఒక అల్యూమినియం ఫాబ్రికేషన్ వర్క్షాప్‌పై దాడి చేశారు. అక్కడ ప్యాకెట్లలో దాచిన 288 గ్రాముల MDMA ను పోలీసులు స్వాధీనం చేసుకున్నారు.

ఈ మొత్తం ఆపరేషన్‌లో షబీర్, అన్షాద్, సుమేష్ లను కూడా అరెస్టు చేశారు. నిందితుల మొబైల్ ఫోన్ల డేటా ఆధారంగా నెట్వర్క్‌తో సంబంధం ఉన్న ఇతరుల కోసం పోలీసులు గాలింపు కొనసాగిస్తున్నట్లు తెలిపారు. ఇటీవలి కాలంలో త్రిసూర్ జిల్లాలో ఇదొక అతిపెద్ద డ్రగ్స్ కేసుగా అధికారులు పేర్కొన్నారు.