రాజమండ్రి హిట్ అండ్ రన్: డాక్టర్ ప్రియాంక తండ్రికి కేటీఆర్ ఫోన్‌ కాల్

బిఆర్ఎస్ వర్కింగ్ ప్రెసిడెంట్ కేటీఆర్ (K T రామారావు) రాజమండ్రి హిట్ అండ్ రన్ ఘటనలో మృతి చెందిన మెడికల్ విద్యార్థిని ప్రియాంక తండ్రితో ఫోన్‌లో మాట్లాడారు. ఆగస్టు 3న ప్రసాదాదిత్య మాల్ వద్ద కారు ఢీకొని ప్రియాంక తీవ్రంగా గాయపడి మృతి చెందారు. ప్రియాంక గద్వాల జిల్లాకు చెందిన వైద్య విద్యార్థిని.

కేటీఆర్ కుటుంబానికి తన సానుభూతిని తెలియజేసి, బిఆర్ఎస్ పార్టీ తరపున న్యాయ సహాయం అందిస్తామని హామీ ఇచ్చారు. ఈ కేసును ఫాస్ట్ ట్రాక్ కోర్టు ద్వారా విచారించాలని, నిందితులకు కఠిన శిక్ష పడేలా చూడాలని ఆయన కోరారు. బాధిత కుటుంబానికి బిఆర్ఎస్ పార్టీ అన్ని విధాలా అండగా ఉంటుందని భరోసా ఇచ్చారు.

ప్రియాంక తండ్రి ఫోన్‌ సంభాషణలో ఆవేదన వ్యక్తం చేశారు. 'ఆమె నా భవిష్యత్తు. నా జీవితాన్ని చంపేసారు. నిందితులకు కఠినమైన శిక్ష పడాలి' అని ఆయన పేర్కొన్నారు. తన పెద్ద కుమార్తె ప్రియాంక కుటుంబ సంరక్షణ, చిన్న కుమార్తెల వివాహం, తన పీజీ చదువుల కోసం శ్రమించిందని వివరించారు.

ఈ కేసులో పోలీసులు మొదట హిట్ అండ్ రన్ కేసు నమోదు చేసి, ఆ తర్వాత హత్యా నేరం కింద మార్చారు. ఇద్దరు నిందితులను అరెస్ట్ చేశారు. వారికి బెయిల్ రాకుండా పోలీసులు తీవ్రంగా వ్యతిరేకిస్తున్నారు. నిందితులు బయటకు వస్తే ప్రజా భద్రతకు ముప్పు ఏర్పడుతుందని వారు వాదిస్తున్నారు.