కేరళ: తల్లి ప్రియుడి వేధింపులతో ఏడాదిన్నర పిల్లాడి దారుణ హత్య, పోస్ట్మార్టంలో 51 గాయాలు

తిరువనంతపురం జిల్లా నెడుమంగాడ్‌లో ఏడాదిన్నర వయసున్న బాలుడు అర్షిద్‌ తల్లి ప్రియుడి చేతిలో తీవ్ర వేధింపులకు గురై మృతి చెందాడు. పోస్ట్మార్టం నివేదికలో బాలుడి శరీరంపై 51 గాయాలు, సిగరెట్ కాల్చిన మచ్చలు, విరిగిన ఎముకలు ఉన్నట్లు పోలీసులు తెలిపారు.

24 ఏళ్ల అఖిల అనే మహిళ భర్తను వదిలి అష్కర్ అనే 31 ఏళ్ల వ్యక్తితో కలిసి జీవిస్తోంది. ఈ బిడ్డ వీరి సంబంధానికి ఆటంకంగా మారడంతో పసివాడిపై నిత్యం చిత్రహింసలు జరిగాయి. ఒక రోజు ఏడుస్తున్న బాలుడిని అష్కర్ గోడకేసి బలంగా కొట్టాడు. ఈ దెబ్బలతో అంతర్గత అవయవాలు దెబ్బతినడంతో పిల్లవాడు మరణించాడు.

తల్లి అఖిల ఈ హింసను అడ్డుకోకపోగా, కుమారుడు తీవ్రంగా గాయపడిన సమయంలో మరో ఊరిలో నృత్య కార్యక్రమంలో పాల్గొందని దర్యాప్తులో తేలింది. మే 30న అనుమానాస్పద మృతిగా కేసు నమోదు చేసిన పోలీసులు పోస్ట్మార్టం రిపోర్ట్ ఆధారంగా అఖిల, అష్కర్‌లను అరెస్ట్ చేశారు. నిందితులిద్దరినీ కోర్టు రిమాండ్‌కు పంపింది. ఈ కేసు తదుపరి విచారణ కొనసాగుతోంది.