అమరావతి ORR సొరంగాల నిర్మాణంలో కీలక మార్పులు: భవిష్యత్ విస్తరణకు అవరోధం

అమరావతి ఔటర్ రింగ్ రోడ్ (ORR) DPR లో మరో కోత పడింది. ఎనిమిది వరుసల రహదారి నిర్మాణానికి వీలుగా సొరంగాలు నిర్మించాలని రాష్ట్ర అధికారులు పంపిన ప్రతిపాదనను జాతీయ రహదారుల ప్రాధికార సంస్థ (NHAI) తిరస్కరించింది. ఆరు వరుసల రహదారికే సొరంగాలు పరిమితం చేయాలని NHAI ఉన్నతాధికారుల నుండి ఆదేశాలు వెలువడ్డాయి.

189.44 కిలోమీటర్ల మేర ఆరు వరుసలతో అమరావతి ORR నిర్మించాలని రాష్ట్ర ప్రభుత్వం ప్రతిపాదించింది. ఇందులో భాగంగా NTR జిల్లా గంగనేని వద్ద అటవీ ప్రాంతంలో 2.78 km, 1.69 km మేర, గుంటూరు జిల్లా పేరేచెర్ల అటవీ ప్రాంతంలో 0.51 km మేర కలిపి మొత్తం 4.98 km మేర మూడు సొరంగాలు నిర్మించాలని నిర్ణయించారు.

ఒక్కో సొరంగంలో వెళ్ళే వాహనాలకు ఒకటి, వచ్చే వాహనాలకు మరొకటి చొప్పున ఉంటాయి. ఒకవైపు నాలుగు, మరోవైపు నాలుగు వరుసలు అనగా మొత్తం ఎనిమిది వరుసల రహదారికి సొరంగాలు నిర్మించాలని అధికారులు ప్రతిపాదించారు. అయితే NHAI ఆదేశాల మేరకు ఇప్పుడు ఆరు వరుసలకు మాత్రమే పరిమితం చేయాలని కోరారు.

ఈ నిర్ణయం భవిష్యత్తులో ORR ను ఎనిమిది వరుసలకు విస్తరించే అవకాశాన్ని దెబ్బతీస్తుందని నిపుణులు హెచ్చరిస్తున్నారు. మూడు సొరంగాల వద్ద విస్తరణ సాధ్యం కాదు, కొత్త సొరంగాల నిర్మాణానికి భారీ ఖర్చు అవుతుందని వారు తెలిపారు.

ఇదే కాకుండా ORR కు తొలుత 38,450 కోట్ల రూపాయలతో ప్రతిపాదనలు పంపగా, తెనాలి సమీపంలో చెన్నై-కోల్‌కతా హైవేతో అనుసంధానించే స్పర్ రోడ్డు ప్రతిపాదన తొలగించారు. అలాగే ORR కు ఇరువైపుల బయటి సర్వీస్ రోడ్డు ప్రతిపాదనను కూడా తొలగించారు. ఇలాంటి కోతలతో ప్రాజెక్టు వ్యయాన్ని 32,000 కోట్ల రూపాయలకు తగ్గించారు.