ఖైరతాబాద్ గణేశుడి నిమజ్జనానికి ఏర్పాట్లు పూర్తి; రేపు ఉదయం శోభాయాత్ర

హైదరాబాద్‌లోని ఖైరతాబాద్ మహాగణపతి నిమజ్జనానికి అన్ని ఏర్పాట్లు పూర్తయ్యాయి. 70 అడుగుల ఎత్తున్న గణేశుడి విగ్రహాన్ని రేపు ఉదయం ఊరేగింపుగా తరలించనున్నారు.

నిర్వాహకుల సమాచారం ప్రకారం, ఉదయం 6 గంటలకు శోభాయాత్ర కార్యక్రమాలు ప్రారంభమవుతాయి. ఖైరతాబాద్ మండపం వద్ద ప్రత్యేక పూజలు, హారతి అనంతరం విగ్రహాన్ని బయలుదేరుస్తారు. ఉత్సవ కమిటీ అధ్యక్షుడు దానం నాగేంద్ర పూజలు నిర్వహిస్తారు.

భారీ విగ్రహాన్ని ఎత్తడానికి NTR మార్గంలో అత్యంత ఆధునిక ఫిక్స్డ్ క్రేన్‌ను ఏర్పాటు చేశారు. ట్రాలీపై విగ్రహాన్ని అమర్చేందుకు వెల్డింగ్, గ్రిల్స్ పనులు చివరి దశలో ఉన్నాయి. ఈ పనులు అర్ధరాత్రి వరకు కొనసాగే అవకాశం ఉందని అధికారులు తెలిపారు.

నిమజ్జన ఊరేగింపు టెలిఫోన్ భవన్, సెక్రటేరియట్ మీదుగా నిమజ్జన ప్రదేశానికి చేరుకుంటుంది. రూట్‌లో పోలీసులు భారీ బందోబస్తు ఏర్పాటు చేశారు. 10 వేలకు పైగా CC కెమెరాలతో నిఘా ఉంటుంది. ఆర్టీసీ ప్రత్యేక బస్సులు కూడా నడుపుతున్నారు.

దాదాపు 4 నుంచి 5 లక్షల మంది భక్తులు శోభాయాత్రలో పాల్గొనే అవకాశం ఉందని నిర్వాహకులు అంచనా వేశారు. ఇప్పటి వరకు 40 నుంచి 50 లక్షల మంది భక్తులు విగ్రహాన్ని దర్శించుకున్నారని ఉత్సవ కమిటీ తెలిపింది. కార్యక్రమానికి ఇంచార్జి మంత్రి పొన్నం ప్రభాకర్ హాజరయ్యే అవకాశం ఉందని నిర్వాహకులు చెప్పారు.