ఖైరతాబాద్ బడా గణేష్కు కర్రపూజ; 69 అడుగుల పంచముఖ మట్టి గణపతి పోస్టర్ విడుదల

ఏకాదశి సందర్భంగా ఖైరతాబాద్ బడా గణేష్ నిర్మాణానికి కర్ర పూజ నిర్వహించి, ఈ ఏడాది విగ్రహం పోస్టర్‌ను నిర్వాహకులు విడుదల చేశారు. ఈ ఏడాది థీమ్‌గా పంచముఖ సంకటహర మహా గణపతిగా 69 అడుగుల మట్టి విగ్రహాన్ని తయారు చేయనున్నట్లు ఖైరతాబాద్ ఉత్సవ సమితి ప్రతినిధి తెలిపారు.

గణేష్ చతుర్థి పండుగ సెప్టెంబర్ 14న రాబోతున్న నేపథ్యంలో దాదాపు 80 రోజుల్లో ఈ భారీ విగ్రహం పూర్తి చేయాలని లక్ష్యంగా పెట్టుకున్నారు. ఐదు తలలతో కూడిన ఈ గణపతి విగ్రహం పక్కన సోమనాథ్ జ్యోతిర్లింగం ప్రతిరూపాన్ని, శివుడు–కాళికామాత ప్రతిమలను కూడా ప్రతిష్టించనున్నారు. కరోనా అనంతర పరిస్థితుల్లో ప్రజలు ఆరోగ్యంగా, ప్రశాంతంగా ఉండాలన్న ఉద్దేశంతో ఈ డిజైన్ ఎంచుకున్నామని నిర్వాహకులు చెప్పారు.

కర్ర పూజ అనంతరం విగ్రహానికి అవసరమైన దుంగలను ఆంధ్రప్రదేశ్ అడవుల నుంచి తీసుకువస్తారు. మట్టి ఒడిశా నుంచి రానుంది. మట్టి విగ్రహం కావడంతో గట్టిదనం కోసం స్టీల్ ఫ్రేమ్‌కు డబుల్ లేయర్ ఉపయోగిస్తారు. దాదాపు 150–200 మంది కార్మికులు రేయింబవళ్ళు పనిచేసి, గడువులోపు విగ్రహాన్ని సిద్ధం చేస్తారని ఉత్సవ సమితి తెలిపింది.

వర్షాకాలం నేపథ్యంలో భారీ వర్షం పడినా విగ్రహానికి నష్టం జరగకుండా ట్రాన్స్పరెంట్ ప్లాస్టిక్ కవర్లు ఏర్పాటు చేస్తామని, గత సంవత్సరం 36 గంటలు కురిసిన వర్షంలోనూ ఎలాంటి హానీ జరగలేదని నిర్వాహకులు గుర్తు చేశారు. సెప్టెంబర్ 14నాటికి ఖైరతాబాద్ బడా గణేష్ దర్శనానికి సిద్ధంగా ఉంటుందని, భక్తులు పెద్దఎత్తున తరలివస్తారని భావిస్తున్నారు.