టీజీ20 ఫైనల్: ఖమ్మం ఏసెస్, హైదరాబాద్ ఈ-ఛాంపియన్స్ టైటిల్ పోరు

టీజీ20 లీగ్ తొలి ఎడిషన్ ఫైనల్ నేడు హైదరాబాద్‌లోని ఉప్పల్ స్టేడియంలో జరగనుంది. తుది పోరులో ఖమ్మం ఏసెస్, హైదరాబాద్ ఈ-ఛాంపియన్స్ జట్లు టైటిల్ కోసం తలపడనున్నాయి.

క్వాలిఫయర్-1లో ఖమ్మం ఏసెస్, హైదరాబాద్‌కు టోర్నీలో తొలి ఓటమిని రుచి చూపించింది. దీంతో ఫైనల్‌కు నేరుగా చేరుకుంది. మరోవైపు హైదరాబాద్ ఈ-ఛాంపియన్స్, క్వాలిఫయర్-2లో కరీంనగర్ డైమండ్స్‌పై 8 వికెట్ల తేడాతో ఘన విజయం సాధించి ఫైనల్‌కు అర్హత సాధించింది.

జట్టు కెప్టెన్లు సీవీ మిలింద్ (హైదరాబాద్), అభిరీత్ రెడ్డి (ఖమ్మం) ఇద్దరూ టైటిల్ గెలవడంపై ధీమా వ్యక్తం చేశారు.

లీగ్ కౌన్సిల్ చైర్మన్ మాట్లాడుతూ, టీజీ20 ప్రతిభ గల యువతకు మంచి ప్లాట్‌ఫామ్ అని పేర్కొన్నారు. వచ్చే ఏడాది నుంచి ప్రతి ఫ్రాంచైజీ తమ జిల్లాల్లో ఓపెన్ ట్రయల్స్ నిర్వహిస్తుందని, దీనివల్ల మరింత మంది ఆటగాళ్లు, కొత్త టాలెంట్ బయటకు వస్తుందని తెలిపారు. ఈ లీగ్ తెలంగాణలో క్రికెట్ నైపుణ్య స్థాయిని మారుస్తుందని, అన్ని స్థాయిల ఆటగాళ్లకు ఉపయోగకరంగా ఉంటుందని ఆయన అభిప్రాయపడ్డారు.