కృష్ణా బేసిన్ ప్రాజెక్టుల్లో నీటి నిల్వలు భారీగా తగ్గాయి

కృష్ణా బేసిన్ లోని ప్రాజెక్టుల్లో నీటి నిల్వలు భారీగా తగ్గాయి. తొలకరి వర్షాలు పడినప్పటికీ నదికి వరద ప్రవాహాలు రాలేదు. గతేడాది మే చివరి వారం నాటికే కర్ణాటకలోని ఆల్మట్టి, నారాయణపూర్, తెలంగాణలోని జూరాల ప్రాజెక్టులకు భారీగా నీరు వచ్చి గేట్లు ఎత్తి విడుదల చేశారు. కానీ ఈ ఏడాది జూన్ నెల దాటినా ఎలాంటి ఇన్‌ఫ్లోలు రాలేదు.

శ్రీశైలం ప్రాజెక్టులో ప్రస్తుతం 44 టీఎంసీల నీరు మాత్రమే నిల్వ ఉంది. దీని పూర్తి సామర్థ్యం 215 టీఎంసీలు. జూరాల ప్రాజెక్టులో కేవలం 3 టీఎంసీల నీటిని తాగునీటి అవసరాలకు వినియోగిస్తున్నారు. కర్ణాటకలోని ఆల్మట్టి, నారాయణపూర్ ప్రాజెక్టులకు కూడా ఇన్‌ఫ్లోలు లేవు. పశ్చిమ కనుమలు, క్యాచ్‌మెంట్ ప్రాంతాల్లో వర్షాలు కురవకపోవడమే ఇందుకు కారణమని అధికారులు తెలిపారు.

పాలమూరు జిల్లా వ్యవసాయానికి జూరాల ప్రాజెక్టు కీలకం. జూరాల కుడి, ఎడమ కాలువలు, భీమా, నెట్టెంపాడు, కోయిల్ సాగర్ వంటి లిప్ట్ పథకాల ద్వారా దాదాపు 8 లక్షల ఎకరాలకు సాగు నీరు అందుతుంది. రైతులు భూములను దున్ని విత్తనాలు కొనుగోలు చేసి సాగుకు సిద్ధంగా ఉన్నారు. కానీ నీటి కొరత కారణంగా సాగు చేపట్టలేకపోతున్నారు. అదును దాటిపోతుందేమోనని ఆందోళన చెందుతున్నారు.

ఎగువ ప్రాంతాల్లో భారీ వర్షాలు లేకపోవడంతో కృష్ణా నదికి వరద రాలేదు. రాబోయే 10 నుంచి 15 రోజుల్లో భారీ వర్షాలు కురిస్తే తప్ప సాగుకు అవకాశం ఉండదని రైతులు చెబుతున్నారు. వర్షాభావ పరిస్థితి కొనసాగుతున్న నేపథ్యంలో అధికారులు పరిస్థితిని నిశితంగా గమనిస్తున్నారు.