పామాయిల్ తోటలో అంతర పంటలుగా కూరగాయలు సాగు చేస్తున్న కృష్ణా రైతు

కృష్ణా జిల్లా బాపులపాడు మండలం కొత్తపల్లి గ్రామానికి చెందిన రైతు షేక్ బాజీ ఐదు ఎకరాల పామాయిల్ తోటలో కూరగాయలను అంతర పంటలుగా సాగు చేస్తున్నారు. నిలువ పందిరి విధానంలో కాకర, బెండ, చిక్కుడు పంటలను నాటి నిరంతర దిగుబడులను తీసుకుంటున్నారు.

రెండు ఎకరాల్లో కాకర, ఎకరంలో బెండ, అర ఎకరంలో పొద చిక్కుడు సాగు చేశారు. కాకర పంటపై ఇప్పటివరకు మూడు కోతలు కోసి రూ.40 వేల ఆదాయం పొందారు. మరో 14 కోతలతో రూ.1.80 లక్షల ఆదాయం వచ్చే అవకాశం ఉందని రైతు తెలిపారు. బెండలో ఇప్పటికే ఎనిమిది కోతలు పూర్తి చేయగా, మరో మూడు నాలుగు కోతలు కోయనున్నారు. చిక్కుడు పంట నుంచి మరో నెల రోజుల్లో దిగుబడి ప్రారంభమవుతుంది.

అయితే, మార్కెట్ ధరలు తగ్గడంతో నష్టం కాకపోయినా ఆశించిన స్థాయిలో లాభం రావడం లేదని రైతు పేర్కొన్నారు. కాకర కిలో ప్రారంభంలో రూ.50 పలికిందని, ప్రస్తుతం రూ.20కు పడిపోయిందని వివరించారు. బెండ ధర కిలో రూ.30-40 నుంచి రూ.10కు తగ్గిందని, చిక్కుడు మాత్రం రూ.40-50 వరకు అమ్ముతున్నామని చెప్పారు.

కూరగాయల పెట్టుబడి మొత్తం దాదాపు రూ.1.5 లక్షలు కాగా, కాకర పంట ద్వారానే ఆ మొత్తం వస్తుందని రైతు అంచనా. బెండ, చిక్కుడు పంటల నుంచి వచ్చేదంతా నికర లాభంగా మిగు లుతుందని తెలిపారు. ఎలాంటి పంట సాగు లేని వేసవిలో సైతం కూరగాయలు పండించడం ద్వారా అదనపు ఆదాయం సమకూరుతున్నట్లు వెల్లడించారు.