₹17 లక్షలతో ‘రైల్వే స్టేషన్’ తీసి ₹35 లక్షలకు విక్రయించిన నటుడు కృష్ణ మాయ

నటుడు, ఆర్ట్ డైరెక్టర్ కృష్ణ మాయ తన ‘రైల్వే స్టేషన్’ సినిమాను కేవలం ₹17 లక్షల బడ్జెట్‌తో నిర్మించి, జెమినీ టీవీకి ₹35 లక్షలకు విక్రయించారు. ఈ వివరాలను ఆయన ఒక ఇంటర్వ్యూలో పంచుకున్నారు.

నిర్మాణ సమయంలో ఆలస్యం లేకుండా, ఒక్క నిమిషం కూడా వృథా చేయకుండా తక్కువ బడ్జెట్‌తో సినిమా పూర్తి చేసినట్లు కృష్ణ మాయ వివరించారు. ‘38 రోజుల్లో షూటింగ్ పూర్తి చేశాను. ఔట్‌డోర్ లొకేషన్లలో కూడా బృందానికి అవసరమైన సౌకర్యాలు కల్పించి సమయాన్ని సద్వినియోగం చేశాను’ అని చెప్పారు.

డిస్ట్రిబ్యూటర్లు-ఎగ్జిబిటర్ల మధ్య ఇటీవలి వివాదాలపై స్పందిస్తూ ‘డబ్బు దగ్గరకు వచ్చేసరికి బంధాలు క్లిష్టంగా మారతాయి. అందుకే సినిమా నిర్మాణంలో అన్ని పార్టీలు సంతృప్తిగా ఉండేలా చూసుకోవాలి’ అని ఆయన వ్యాఖ్యానించారు.

త్వరలో మరిన్ని చిత్రాలను నిర్మించనున్నట్లు కృష్ణ మాయ తెలియజేశారు.