తెలంగాణలో రెండున్నరేళ్లలో రూ.4 లక్షల కోట్ల అప్పు చేశారని కేటీఆర్ ఆరోపణ

కాంగ్రెస్ ప్రభుత్వం రెండున్నర ఏళ్ల పాలనలో రూ.4 లక్షల కోట్ల అప్పు చేసిందని BRS వర్కింగ్ ప్రెసిడెంట్ కేటీఆర్ ఆరోపించారు.

BRS పాలనలో రైతుబంధు, యూరియా సకాలంలో రైతులకు అందాయని, కాంగ్రెస్ వచ్చాక ఇవి ఎందుకు బంద్ అయ్యాయో చెప్పాలని ఆయన ప్రశ్నించారు. దేశ చరిత్రలో ఏ ఒక్క సీఎం కూడా చేయని విధంగా 70 లక్షల మంది రైతుల ఖాతాల్లో రూ.73 వేల కోట్లు జమ చేసింది KCR మాత్రమేనని కేటీఆర్ కొనియాడారు.

మాజీ మంత్రి సబితా ఇంద్రారెడ్డి మాట్లాడుతూ, మహిళలను కోటీశ్వరులు చేస్తామన్న రేవంత్ రెడ్డి తన మాట నిలబెట్టుకోవాలని డిమాండ్ చేశారు. రాష్ట్రంలో 1.60 కోట్ల మంది మహిళల ఖాతాల్లో రూ.1.5 లక్షల చొప్పున జమ చేయాలని రేవంత్‌కు సవాల్ విసిరారు.

మైనారిటీ వర్గాలకు కాంగ్రెస్ హయాంలో ఒరిగింది ఏమీ లేదని మాజీ మంత్రి జోగు రామన్న విమర్శించారు. KCR పాలనలో మైనారిటీల కోసం సంక్షేమ గురుకుల పాఠశాలలు ఏర్పాటు చేశామని, కాంగ్రెస్ మాత్రం ఒక్కటి కూడా ఏర్పాటు చేయలేదని ఆరోపించారు.

ఈ విషయంపై కాంగ్రెస్ పార్టీ స్పందన తెలియాల్సి ఉంది.