కేసీఆర్ నుంచి మంత్రి పదవి వచ్చినా మొదట వద్దన్న కేటీఆర్

BRS నాయకుడు, సిరిసిల్ల ఎమ్మెల్యే కే.టి.రామారావు (కేటీఆర్) తాను రాష్ట్ర మంత్రిగా బాధ్యతలు తీసుకోవడానికి మొదట నిరాకరించినట్లు వెల్లడించారు. తండ్రి, ఆనాటి ముఖ్యమంత్రి కె.చంద్రశేఖర్ రావు (కేసీఆర్) నుంచి మంత్రి పదవి ఆహ్వానం వచ్చినా, నెపోటిజం (కుటుంబ పక్షపాతం) ఆరోపణలు వస్తాయని భయపడి అంగీకరించలేదని ఆయన ఒక కార్యక్రమంలో తెలిపారు.

కేటీఆర్ మాట్లాడుతూ, 'తెలంగాణ రాష్ట్ర ఏర్పాటు తర్వాత అప్పటి బిఆర్ఎస్ పార్టీ కాంగ్రెస్‌లో విలీనం అవుతుందని అనుకున్నాను. ఆ సమయంలో రాజకీయాల నుంచి తప్పుకోవాలని కూడా నిర్ణయించుకున్నాను. కానీ అనుకోని పరిణామాలతో బిఆర్ఎస్ ఒంటరిగా ఎన్నికల్లో పోటీ చేసి అధికారంలోకి వచ్చింది' అని వివరించారు.

ఆ తర్వాత కేసీఆర్ తనకు మంత్రి పదవి ఇవ్వాలని ప్రతిపాదించినప్పుడు, 'కొడుకుకు ఇచ్చారని మీరు బద్నామ్ అవుతారు' అని చెప్పి తిరస్కరించానని, అయితే కేసీఆర్ 'నీకు పదవి ఇచ్చినప్పుడు ప్రూవ్ చేసుకో, పని చేయి' అని సలహా ఇవ్వడంతో బాధ్యతలు చేపట్టినట్లు చెప్పారు. తాను సిన్సియర్‌గా పని చేశానని, కానీ కొంత విమర్శలు కూడా ఎదుర్కొన్నానని కేటీఆర్ గుర్తించారు.

రాజకీయాలు వారసత్వ హక్కు కాదని, రాజకీయ నాయకుల పిల్లలపై వారి తల్లిదండ్రుల ప్రభావం సహజంగా ఉంటుందని, కానీ అదే హక్కు అని తాను ఎప్పుడూ అనుకోలేదని కేటీఆర్ స్పష్టం చేశారు. తన ఏకైక లక్ష్యం కేసీఆర్ మళ్ళీ ముఖ్యమంత్రి కావడమేనని, వేరే గోల్ లేదని ఆయన ఈ సందర్భంగా ప్రకటించారు.